14.12.2025 | 13:11
ՀՀ դրոշ՝ Սուրբ Գևորգ եկեղեցում. Արմավիրի թեմում Փաշինյանի ցանկությունը չեն անտեսել
Երեք ամսում գրանցվել է 2935 արտակարգ դեպք. ՆԳՆ ՓԾ գործունեության արդյունքները
04.04.2024 | 22:40
Ապրիլի 4-ին ՆԳՆ փրկարար ծառայությունում ՓԾ տնօրեն-ներքին գործերի նախարարի տեղակալ, փ/ծ գնդապետ Կամո Ցուցուլյանի գլխավորությամբ տեղի է ունեցել աշխատանքային խորհրդակցություն։ ՓԾ-ից տեղեկացնում են՝ հանրապետությունում գրանցվել է 2935 արտակարգ դեպք, պատահար, որից 1214-ը՝ հրդեհի, 924-ը՝ ճանապարհատրանսպորտային պատահարի, 491-ը՝ թունավորման, 27-ը՝ փլուզման, 11-ը՝ պայթյունի, 2026-ը՝ կենցաղային և այլ դեպքեր։ Հրդեհների մեծ մասը գրանցվել է բուսածածկ տարածքներում, ինչի հետևանքով այրվել է մոտ 639.6 հա տարածք։
«Խորհրդակցությանը մասնակցում էին ՓԾ տնօրենի տեղակալները, կառուցվածքային և տարածքային ստորաբաժանումների ղեկավարները, Երևան քաղաքի փրկարարական վարչության հրշեջ-փրկարարական ջոկատների հրամանատարները։
Խորհրդակցության ընթացքում ՆԳ ՓԾ տնօրենին ներկայացվեցին 2024 թվականի առաջին եռամսյակում ՆԳՆ Փրկարար ծառայության գործունեության արդյունքները, մասնավորապես՝ արտակարգ իրավիճակներում բնակչության պաշտպանության խնդիրների իրականացման, քաղաքացիական պաշտպանության համակարգի կատարելագործման և արձագանքման արդյունավետ կազմակերպման ուղղություններով կատարված աշխատանքները։
Հաշվետու ժամանակահատվածում հանրապետությունում գրանցվել է 2935 արտակարգ դեպք, պատահար, որից 1214-ը՝ հրդեհի, 924-ը՝ ճանապարհատրանսպորտային պատահարի, 491-ը՝ թունավորման, 27-ը՝ փլուզման, 11-ը՝ պայթյունի, 2026-ը՝ կենցաղային և այլ դեպքեր։ Հրդեհների մեծ մասը գրանցվել է բուսածածկ տարածքներում, ինչի հետևանքով այրվել է մոտ 639.6 հա տարածք։
ՓԾ ստորաբաժանումների կողմից փրկվել է 41 մարդ։ Դիտարկվող ժամանակահատվածում, տարբեր գործոններով պայմանավորված, ՓԾ ստորաբաժանումները հանրապետության ավտոճանապարհներին արգելափակումից դուրս են բերել 3967 տրանսպորտային միջոց և անվտանգ տարածք տեղափոխել 7798 մարդ։ Ժամանակավոր հենակետերը սպասարկել են 127 դեպք, արգելափակումից դուրս են բերել 799 տրանսպորտային միջոց։
Աշխատանքներ են տարվել արտակարգ իրավիճակների կանխարգելման և հետևանքների վերացման ուղղությամբ․ իրազեկման և ուսուցման նպատակով հանրակրթական, նախնական մասնագիտական (արհեստագործական), միջին մասնագիտական և բարձրագույն ուսումնական հաստատություններում «Երկրաշարժի ժամանակ բնակչության վարվելակերպի կանոնները» և «Բնակչության տարհանման կազմակերպում» թեմաներով Փրկարար ծառայության կողմից կազմակերպվել և անցկացվել է 464 դասընթաց, որին մասնակցություն են ունեցել նաև ՆԳՆ ոստիկանության պարեկային ծառայողները։
Գետերի հուների, հեղեղատարերի և սելավատարերի վտանգավոր տեղամասերում մաքրման, խորացման և այլ անհրաժեշտ միջոցառումների իրականացմամբ հարակից տարածքներում անվտանգ միջավայրի ապահովման նպատակով ՀՀ տարածքային կառավարման և ենթակառուցվածքների նախարարություն են ներկայացվել մի շարք առաջարկություններ։ Մշակվել են արդյունաբերական օբյեկտների անվտանգության վկայագրեր, Վեդի համայնքի և ՀՀ-ում 2 նորակառույց դպրոցների աղետների ռիսկի կառավարման պլաններ։
Աշխատանքներ են իրականացվել պլանների, ծրագրերի մշակման և իրականացման, քաղաքացիական պաշտպանության համակարգի նախապատրաստման, փրկարարական ուժերի պատրաստության, բժշկական և հոգեբանական աջակցության ցուցաբերման ուղղություններով։
«Առաջին բուժօգնություն» և «Առաջին հոգեբանական օգնություն» թեմաներով դասընթացներ են անցկացվել ՆԳՆ փրկարարական և ոստիկանության ծառայողների, այլ գերատեսչությունների աշխատակիցների հետ, ինչպես նաև դպրոցներում և մանկապարտեզներում։
Կատարված և ընթացիկ աշխատանքների վերաբերյալ ստորաբաժանումների ղեկավարների զեկույցները լսելուց հետո Ծառայության Տնօրենը տվեց հստակ կարգադրություններ և հանձնարարականներ՝ մատնանշելով տարբեր ստորաբաժանումներում գործունեության ընթացքում ի հայտ եկած խնդիրները։
Փրկարար ծառայության տնօրենը կարգադրեց աշխատանքներ իրականացնել ծառայության բարելավման ուղղությամբ՝ ուշադրության կենտրոնում պահելով կատարողականը և աշխատանքային կարգապահությունը։
Կամո Ցուցուլյանը հանձնարարեց զբոսաշրջության ակտիվացմամբ և գարնանային գյուղատնտեսական աշխատանքներով պայմանավորված՝ վերահսկողությունն ուժեղացնել բուսածածկ և խոտածածկ տարածքներում՝ հրդեհների առաջացումը կանխարգելելու նպատակով։ Միաժամանակ ուսումնասիրություններ անցկացնել սողանքավտանգ գոտիներում, քարաթափման վտանգավոր հատվածներում, անհրաժեշտության դեպքում ակտիվ մասնակցություն ցուցաբերել հարկադիր քարաթափման աշխատանքներին:
Ամփոփելով եռամսյակի ընթացքում կատարված աշխատանքները՝ ՓԾ տնօրենը շնորհակալություն հայտնեց շարքային անձնակազմին՝ բարեխիղճ ծառայության և պատրաստակամության համար, նշելով, որ առանձնակի բարդության դեպքերի պատշաճ արձագանքման և լավագույնս կատարած աշխատանքի համար խրախուսվել են մի շարք փրկարարական ծառայողներ։
Հաշվետու ժամանակահատվածում կատարած արդյունավետ աշխատանքի և կատարողականի համար բարձր գնահատվեց Երևան քաղաքի փրկարարական վարչության ստորաբաժանումների, Հոգեբանական աջակցության բաժնի և Բժշկական ապահովման վարչության գործունեությունը։
Խորհրդակցության ավարտին ՓԾ տնօրենն ամփոփեց արդյունքները՝ դրական գնահատելով կատարված աշխատանքները, տվեց մի շարք հանձնարարականներ՝ աշխատանքներն առավել արդյունավետ իրականացնելու նպատակով»,- ասված է հաղորդագրության մեջ։
