09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Մեծ Բրիտանիայի պաշտպանության նախարարը հայտարարել է նախապատերազմյան ժամանակների սկսվելու մասին
Քաղաքականություն
04.04.2024 | 16:56
Աշխարհը թևակոխել է նախապատերազմական ժամանակաշրջան՝ Ուկրաինայի դեմ ռուսական ագրեսիայի և այլ ավտորիտար երկրների գործողությունների պատճառով, հայտարարել է Մեծ Բրիտանիայի պաշտպանության նախարար Գրանտ Շափսը։
«Մենք հետպատերազմյան աշխարհից տեղափոխվել ենք նախապատերազմյան աշխարհ։ Ռուսաստանը սպառնում է մեր հարեւաններին։ Չինաստանը գնալով ավելի ագրեսիվ է դառնում։ Իրանն օգտագործում է իր վստահված անձանց՝ Մերձավոր Արևելքից մինչև Եմենի նեղուց, տարածաշրջանային քաոս առաջացնելու համար։ Իսկ Հյուսիսային Կորեան անընդհատ թափահարում է իր միջուկային թուրը: Այս չարամիտ ուժերը գնալով ավելի են միավորվում, իսկ մեր ժողովրդավարությունը նրանց խաչմերուկում է»,- The Telegraph-ում գրել է Շափսը ՆԱՏՕ-ի հիմնադրման 75-ամյակին նվիրված սյունակում:
Այս ֆոնին, ըստ բրիտանացի պաշտոնյայի, Հյուսիսատլանտյան դաշինքի երկրները պետք է ուժեղացնեն իրենց ընդհանուր պաշտպանունակությունը և պաշտպանական ծախսերը հասցնեն ՀՆԱ-ի 2%-ին։
«Սակայն որոշ երկրներ դեռևս չեն կարողանում հասնել նույնիսկ 2%-ի։ Սա չի կարող շարունակվել: Մենք չենք կարող մեզ թույլ տալ խաղալ «ռուսական ռուլետկավ մեր ապագայի հետ»,- ասել է Շափսը:
Մինչ այս, Լեհաստանի վարչապետ Դոնալդ Տուսկն էր հայտարարել նախապատերազմական ժամանակների սկիզբի մասին։ Նրա խոսքով՝ այս պահին «բառացիորեն ցանկացած սցենար» հնարավոր է, եվրոպական երկրները նման իրավիճակ չեն ապրել 1945 թվականից ի վեր։
