12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Հաագայում 44 երկրներ աջակցել են Ուկրաինայում պատերազմի համար ՌԴ-ի դեմ հատուկ տրիբունալի ստեղծմանը
Քաղաքականություն
03.04.2024 | 18:19
Հաագայում տեղի ունեցած «Արդարության վերականգնում Ուկրաինայի համար» համաժողովի քաղաքական հռչակագիրը ստորագրել են 44 պետություններ, որն աջակցություն է հայտնում ագրեսիայի հանցագործության համար հատուկ տրիբունալի ստեղծմանը և ՌԴ-ի սառեցված ակտիվներն Ուկրաինայի օգտին օգտագործելու նախաձեռնություններին։
Այն մինչ այժմ ստորագրել են Ալբանիան, Անդորրան, Ավստրալիան, Ավստրիան, Բելգիան, Բոսնիա և Հերցեգովինան, Բուլղարիան, Կանադան, Խորվաթիան, Կիպրոսը, Չեխիան, Դանիան, Էստոնիան, Ֆինլանդիան, Ֆրանսիան, Վրաստանը, Գերմանիան, Հունաստանը, Իսլանդիան, Իռլանդիա, Իտալիա, Ճապոնիա, Լատվիա, Լիխտենշտեյնը, Լիտվան, Լյուքսեմբուրգը, Մալթան, Մոլդովան, Մոնակո, Մոնտենեգրոն, Նիդեռլանդները, Նոր Զելանդիան, Հյուսիսային Մակեդոնիան, Նորվեգիան, Լեհաստանը, Պորտուգալիան, Ռումինիան Սան Մարինոն, Սլովենիան, Իսպանիան, Շվեդիան, Ուկրաինան, Մեծ Բրիտանիան և ԱՄՆ-ն։ Համաժողովին, ընդհանուր առմամբ, մասնակցել է 57 երկիր։
Հռչակագրին միացած երկրները դատապարտում են Ռուսաստանի ագրեսիան Ուկրաինայի դեմ՝ որպես միջազգային իրավունքի և կարգի կոպտագույն խախտում և հիշեցնում են ՄԱԿ-ի դատարանի 2022 թվականի մարտի 16-ի որոշումը, որով Ռուսաստանը պարտավորվում էր դադարեցնել ռազմական գործողությունները։
Երկրները կոչ են անում մեծացնել համատեղ ջանքերը՝ ապահովելու պատշաճ հետաքննություն և պատասխանատվություն միջազգային իրավունքի բոլոր խախտումների համար, որոնք կատարվել են Ուկրաինայի դեմ Ռուսաստանի պատերազմի ժամանակ, ներառյալ՝ ագրեսիայի հանցագործությունը:
Երկրները հաստատում են իրենց մտադրությունները՝ աշխատելու հատուկ տրիբունալի ստեղծման ուղղությամբ՝ Ռուսաստանին պատասխանատվության ենթարկելու Ուկրաինայի դեմ ագրեսիայի հանցագործության համար, ինչը կնպաստի ՌԴ բարձրագույն ռազմաքաղաքական ղեկավարության պատժին և «ողջունում է զգալի առաջընթացն այս ուղղությամբ»՝ կոչ անելով պետություններին և միջազգային կազմակերպություններին օգնել մշակել իրավական դաշտ ու միջազգային աջակցություն այս գործընթացն ավարտին հասցնելու համար: Երկրները նաև ողջունում են Նիդերլանդների պատրաստակամությունը՝ ընդունելու հատուկ տրիբունալը։
Փաստաթուղթը նաև ողջունում է Ուկրաինային պատճառված վնասի փոխհատուցմանը, վնասի ռեգիստրի մեկնարկը, որը դիմումների ընդունումը սկսում է ապրիլի 2-ից։
Երկրները վստահեցնում են, որ իրենց իրավասությունում գտնվող Ռուսաստանի Դաշնության սուվերեն ակտիվները սառեցված կմնան այնքան ժամանակ, քանի դեռ Ռուսաստանը չի դադարեցրել ագրեսիան Ուկրաինայի դեմ և չի վճարել պատճառված վնասը, ինչպես նաև ողջունում են այդ ակտիվները և դրանցից ստացված եկամուտներն ի նպաստ Ուկրաինայի օգտագործելու հնարավորության քննարկումները:
