04.04.2026 | 17:00
Անհապաղ վերացնել Դավիթ Մինասյանի կալանքը և իրականացնել բազմակողմանի քննություն. ՀԿ-ների պահանջը
ԱՄՆ-ը զգուշացրել է ՌԴ-ին, որ ահաբեկիչների թիրախը կարող է «Կրոկուս»-ը լինել․ The Washington Post
Քաղաքականություն
03.04.2024 | 13:45
Վաշինգտոնը նախազգուշացրել է Մոսկվային հնարավոր ահաբեկչությունների մասին և հայտնել, որ ահաբեկիչների թիրախը կարող է լինել «Կրոկուս սիթի հոլլ» համերգասրահը։ Այս մասին հայտնում է The Washington Post-ը՝ հղում անելով անանուն ամերիկացի պաշտոնյաներին, փոխանցում է Current Time-ը։
Լրատվամիջոցի տվյալներով՝ հետախուզական ծառայության տեղեկությունները Մոսկվայում գործընկերներին հասել են դեռևս մարտի 6-ին, մինչ ԱՄՆ դեսպանատունը նախազգուշացում էր հրապարակել մարդաշատ վայրերում, այդ թվում՝ համերգասրահներում հնարավոր ահաբեկչությունների մասին և իր քաղաքացիներին խորհուրդ տվել զերծ մնալ հանրային միջոցառումներին մասնակցելուց: WP-ի տվյալներով՝ ԱՄՆ-ը նախազգուշացրել է հարձակման երկու հնարավոր վայրերի՝ սինագոգի և «Կրոկուս»-ի մասին։
Ավելի վաղ ՌԴ ԱԴԾ-ն հայտնել էր, որ կանխել է ԻԼԻՊ-ի հարձակումը Մոսկվայի սինագոգի վրա։ Այդ ժամանակ հատուկ ծառայությունը սպանել էր Ղազախստանի քաղաքացիներ 35-ամյա Սաբիթ Աշիրալիևին և 32-ամյա Ջանիբեկ Տասկուլաևին։ Անվտանգության աշխատակիցների խոսքով՝ նրանք Ռուսաստան էին ժամանել 2022 թվականի փետրվարի 28-ին և հանդիսացել «Վիլայաթ Խորասան» խմբավորման անդամներ, որը ԻԼԻՊ-ի ճյուղերից է։ Հենց «Վիլայաթ Խորասանն» էլ հետագայում ստանձնել է «Կրոկուսի» վրա հարձակման պատասխանատվությունը:
Նախօրեին էլ ՌԴ Արտաքին հետախուզության ծառայության ղեկավար Սերգեյ Նարիշկինը Մոսկվայի մարզում նախապատրաստվող ահաբեկչության մասին ԱՄՆ-ից ստացված տեղեկատվությունը «չափազանց ընդհանրական» էր անվանել, որը թույլ չի տվել լիովին բացահայտել նրանց, որոնք «մասնակցել են այդ սարսափելի հանցագործությանը»։
Reuters-ն իր հերթին հայտնել է, որ Իրանը ևս զգուշացրել է Ռուսաստանին «Վիլայաթ Խորասանի» կողմից հնարավոր ահաբեկչությունների մասին։
Հիշեցնենք՝ մարտի 22-ին մերձմոսկովյան «Կրոկուս սիթի հոլլ» համերգասրահում տեղի ունեցած ահաբեկչության հետևանքով 144 մարդ է զոհվել:
