01.05.2026 | 09:27
Հայաստանի Հանրապետությունը ծաղկում է ապրում, և սա բոլորիդ աշխատանքի շնորհիվ է․ ՀՀ վարչապետի ուղերձը
Ռուսական «Միր» քարտերը կդադարեն գործել նաև Ղրղզստանում
Քաղաքականություն
03.04.2024 | 12:09
Ապրիլի 5-ից Ղրղզստանում կդադարեն գործել ռուսական «Միր» ազգային վճարային համակարգի քարտերը։ Այս մասին հայտարարել է Ղրղզստանի ազգային վճարային համակարգի օպերատոր «Էլքարտ» միջբանկային պրոցեսինգային կենտրոնը (IPC), որի անդամ բանկերն ընդունում էին «Միր» քարտերը։
Ըստ օպերատորի հայտարարության՝ ԱՄՆ Ֆինանսների նախարարության արտաքին ակտիվների վերահսկման բաժինը պատժամիջոցներ է սահմանել «Միր» վճարային համակարգի քարտերի օպերատոր «Վճարային քարտերի ազգային համակարգի» դեմ:
«Երկրորդային պատժամիջոցների ռիսկը նվազագույնի հասցնելու նպատակով Միջբանկային պրոցեսինգային կենտրոնը, որպես «Էլքարտ» ազգային վճարային համակարգի անխափան աշխատանքի երաշխավոր, տեղեկացնում է ապրիլի 5-ից իր ենթակառուցվածքում «Միր» բանկային քարտերի սպասարկման դադարեցման մասին»,- ասվում է հաղորդագրությունում։
Նշվում է, որ «Միր» քարտերից օգտվողներին այլևս հասանելի չեն լինի POS տերմինալներում անկանխիկ վճարումները, բանկոմատներից գումարի կանխիկացումը, քարտից քարտ փոխանցումները և ինտերնետ վճարումները։
«Էլքարտ» քարտերն իրենց հերթին կդադարեն գործել Ռուսաստանում։
