Քաղաքականություն
02.04.2024 | 17:34
Փաստաբան Իգոր Տրունովը, որը ներկայացնում է «Կրոկուս Սիթի Հոլլ»-ում տեղի ունեցած ահաբեկչության 11 տուժածների շահերը, դիմում է ներկայացրել Ռուսաստանի Դաշնության Քննչական կոմիտե՝ պահանջելով քրեական գործ հարուցել սեփականատերերի դեմ՝ «ոչ անվտանգ ծառայություններ մատուցելու համար»։ Այս մասին հայտնում է Ռիա Նովոստին, որին վկայակոչում է Meduza-ն։
Տրունովի խոսքով՝ դիմումը ներկայացվել է 11 տուժածների, ինչպես նաև զոհերի հարազատների անունից։ Քննչական կոմիտեի ղեկավար Ալեքսանդր Բաստրիկինին ուղղված հայտարարության մեջ ասվում է, որ օբյեկտի սեփականատերերը, հնարավոր է, պատշաճ կերպով ներգրավված չեն եղել օբյեկտի հրդեհային պաշտպանության գործում։ Այսպիսով, փաստաթղթում ասվում է, որ համերգասրահի բեմի վարագույրը «մի քանի վայրկյանում» բռնկվել է, ինչը, ըստ պաշտպանական կողմի, կարող է վկայել հրդեհային անվտանգության կանոնների խախտման մասին. վարագույրը պետք է պատրաստված լինի հրակայուն գործվածքից։
«Հրդեհը բռնկվելուց վայրկյանների ընթացքում դահլիճի նստատեղերը ևս բռնկվել են և վառվել, այն դեպքում, երբ դրանք պետք է պատրաստված լինեին հրակայուն նյութերից»,- ասվում է դիմումի մեջ։
Փաստաթղթում նաև ասվում է, որ ոչ աշխատանքային վիճակում են եղել «հրդեհաշիջման ջրի վարագույրը» և ծխի հեռացման համակարգը։ Տրունովը նաև նշել է, որ, ըստ վկաների ցուցմունքների, ահաբեկչության և տարհանման պահին վթարային ելքերը փակ են եղել։
Մարտի 22-ին տեղի ունեցած ահաբեկչության ժամանակ այրված «Կրոկուս Սիթի Հոլլի» սեփականատերը Crocus Group-ն է, որի նախագահն է Արազ Աղալարովը՝ Ադրբեջանի նախագահ Իլհամ Ալիևի նախկին խնամին։ Աղալարովի որդին՝ Էմինը, Crocus Group-ի առաջին փոխնախագահն էր մինչև 2023 թվականը։ Նա Ալիևի դստեր՝ Լեյլա Ալիևայի նախկին ամուսինն է։
