Թուրքիայում ՏԻՄ ընտրություններից հետո Ալիևը չի շտապում զանգահարել Էրդողանին

Պաշտոնական Բաքուն դեռևս չի արձագանքել Թուրքիայում մայիսի 31-ին տեղի ունեցած ՏԻՄ ընտրություններին, որոնց արդյունքներով նախագահ Ռեջեփ Թայիփ Էրդողանի «Արդարություն ու զարգացում» կուսակցությունը 2002 թ-ին իշխանության գալուց ի վեր իր ամենամեծ պարտությունն է կրել։ Թուրքիայի  ընտրություններում Էրդողանի պարտությանն ու թուրքական ընդդիմության հաղթանակին ադրբեջանական պետական ու քարոզչական լրատվամիջոցները, ինչպես նաև պաշտոնյաները նախընտրում են չանդրադառնալ։

Պետական AzTV և  İctimai TV-ն  ոչ մի նորություն չեն հեռարձակել ընտրություններում  CHP-ի՝ Ժողովրդահանրապետական կուսակցության  հաղթանակի մասին։

Ադրբեջանի նախագահ Իլհամ Ալիևն էլ, որը նախորդ ՏԻՄ ընտրություններից հետո սովորաբար զանգահարում էր Էրդողանին, այս անգամ դեռևս լուռ է։ 2014 ու 2019 թթ-ի ՏԻՄ ընտրություններից հետո Ալիևը  ընտրատեղամասերի փակվելուց ու նախնական արդյունքների հրապարակումից մի ժամ հետո զանգահարել էր Էրդողանին ու շնորհավորել ընտրություններում հաղթանակի կապակցությամբ։

Ի դեպ, մարտի 31-ին երեկոյան Էրդողանին էին զանգահարել Ուզբեկստանի նախագահ Շավկաթ Միրզոևն ու Ղրղզստանի նախագահ Սադիր Ժապարովը։ Նրանք շնորհավորել էին «ժողովրդավարական հասունությամբ ընտրությունների անցկացման համար»։

Հիշեցնենք, որ Թուրքիայում քվեաթերթիկների 100 տոկոսի հաշվարկի նախնական արդյունքներով ընդդիմադիր Ժողովրդահանրապետական կուսակցությունը՝ CHP-ն,  հավաքել է ձայների ավելի քան 37,76 տոկոսը, ԱԶԿ-ն՝ 35,48 տոկոսը։ Անկարայում ընդդիմադիր գործող քաղաքապետ Մանսուր Յավաշը հավաքել է  ձայների 60,38 տոկոսը, ԱԶԿ-ի թեկնածու Թուրգուտ Ալթինոքը 31,69 տոկոսը, Ստամբուլում գործող քաղաքապետ Էքրեմ Իմամօղլուն 51,14 տոկոսը, Էրդողանի թեկնածու Մուրադ Քուրումը 39,59 տոկոսը, Իզմիրում ընդդիմադիր Ջեմիլ Թուգայը ստացել է ձայների 48,96 տոկոսը, իշխող ուժից Համզա Դաղը 37,06 տոկոսը։

Էմմա Չոբանյան