03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
«Վագներականները» Մալիում սպանում են քաղաքացիական անձանց․ Human Rights Watch
Քաղաքականություն
29.03.2024 | 16:52
Ռուսական «Վագներ» մասնավոր ռազմականացված կազմակերպության վարձկաններն օգնում են Մալիի զորքերին ԱԹՍ-ների միջոցով գրոհներ ու հարձակումներ իրականացնել, որոնք հանգեցրել են տասնյակ խաղաղ բնակիչների մահվան։ Այս մասին ասվում է Human Rights Watch միջազգային իրավապաշտպանկազմակերպության զեկույցում, գրում է AP-ն։
Նշվում է, որ ռեժիմի տապալումից հետո Մալիի նոր «կառավարությունը» հրաժարվել է իր նախկին գաղութի տարածքում տեղակայված ֆրանսիական զորքերից։ Միաժամանակ, խունտան օգնություն է հրավիրել Ռուսաստանից, որը «Վագներ» մասնավոր ռազմականացված խմբավորման զինյալներին է ուղարկել տարածաշրջան։
«Բռնությունը Մալիում աճել է այն բանից հետո, երբ ռուս վարձկանները ժամանել են այնտեղ 2021 թվականի հեղաշրջումից հետո: Իշխող խունտան ակտիվացրել է գործողություններն անօդաչու թռչող սարքերի մահացու հարվածներով՝ ուղղված քաղաքացիական հավաքույթներին, ինչպես նաև ռուս վարձկանների հարձակումներին, որոնք սպանել են խաղաղ բնակիչներին»,- ասվում է զեկույցում:
Պարբերականը գրում է, որ չնայած «Վագների» առաջնորդ Եվգենի Պրիգոժինի մահվանը՝ խմբավորումը շարունակում է գործել Մալիում։ Մասնավորապես, հունվարին «Վագների» զորքերը մտել էին Մալիի կենտրոնում գտնվող ռազմաբազայի մոտ գտնվող գյուղը և ձերբակալել 25 մարդու, այդ թվում՝ չորս երեխաների։ Նրանց մարմինները հայտնաբերվել են ավելի ուշ՝ աչքերը կապած և գլխին հրազենային վնասվածքներով։
Ավելի վաղ էլ, անօդաչու թռչող սարքերի հարվածների հետևանքով զոհվել էր ևս 13 խաղաղ բնակիչ, այդ թվում՝ 2-ից 17 տարեկան յոթ երեխա։
