14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ՄԱԿ-ի դատարանն Իսրայելին պարտավորեցրել է լրացուցիչ ուղիներ բացել՝ Գազայի հատված օգնություն հասցնելու համար
Քաղաքականություն
29.03.2024 | 13:18
Արդարադատության միջազգային դատարանն իրավաբանորեն պարտավորեցնող վճիռ է կայացրել, որով Իսրայելից պահանջվում է ավելի շատ ուղիներ բացել դեպի Գազայի հատված, որպեսզի սովահարության մատնված պաղեստինցիները կարողանան ավելի շատ մարդասիրական օգնություն ստանալ, գրում է VOA-ն:
Հաագայի դատարանի որոշումն Իսրայելին պարտավորեցրել է ձեռնարկել «բոլոր անհրաժեշտ և արդյունավետ միջոցները»՝ ապահովելու «անհրաժեշտ հիմնական ծառայությունների և մարդասիրական օգնության» անհապաղ առաքումը, ներառյալ՝ սնունդ, ջուր, վառելիք ու դեղորայք:
Դատարանը նաև Իսրայելից պահանջել է անհապաղ միջոցներ ձեռնարկել՝ «ապահովելու, որ իր զինվորականները չկատարեն այնպիսի գործողություններ, որոնք խախտում են Գազայում պաղեստինցիների իրավունքները՝ որպես խմբի, որը պաշտպանված է «Ցեղասպանության հանցագործությունը կանխելու և պատժելու մասին» կոնվենցիայով, այդ թվում՝ անհապաղ անհրաժեշտ մարդասիրական օգնության մատակարարման ցանկացած գործողությանը խոչընդոտելու միջոցով»:
Դատարանն Իսրայելին պարտավորեցրել է մեկ ամսվա ընթացքում զեկուցել, թե ինչպես է կատարում այդ պահանջները։
Իսրայելը դեռևս չի մեկնաբանել դատարանի որոշումը, սակայն կտրականապես հերքել է ցեղասպանություն իրագործումը ՀԱՄԱՍ-ի զինյալների դեմ շուրջ վեցամսյա պատերազմի ընթացքում և ՄԱԿ-ի դատարանին կոչ է արել նոր հրամաններ չարձակել։
