Քաղաքականություն
28.03.2024 | 15:51
ԱՄՆ Կոնգրեսի Ներկայացուցիչների պալատի զինված ուժերի հանձնաժողովի պատվիրակությունը վաղը կայցելի Թուրքիա։ Այս մասին գրում են թուրքական լրատվամիջոցները՝ վկայակոչելով Թուրքիայի ՊՆ աղբյուրներին։
Ամերիկյան պատվիրակությանn ընդունելու է Թուրքիայի պաշտպանության նախարար Յաշար Գյուլերը։
«Նախարարը վաղը կընդունի ԱՄՆ Ներկայացուցիչների պալատի պաշտպանության հանձնաժողովի չորս անդամի։ Հանդիպումը հնարավորություն կտա ամենաբարձր մակարդակով արտահայտել մեր ազգային անվտանգության զգայունությունը այնպիսի հարցերի շուրջ, ինչպիսիք են ահաբեկչության դեմ պայքարը և ԱՄՆ-ի աջակցությունը PKK/YPG-ին, որոնք մեր երկկողմ ռազմական հարաբերությունների օրակարգում են, ինչպես նաև F-16-ի գնման և արդիականացման գործընթացը, Կոնգրեսի հաստատմանը սպասվող գնումների նախագծերը»,- ասել է աղբյուրը։
Հավելենք, որ վերջին շրջանում թուրք-ամերիկյան հարաբերությունների որոշակի բարելավման ֆոնին՝ երկու երկրների միջև տարբեր պատվիրակությունների այցերը հաճախակիացել են։ Վերջերս այցով ԱՄՆ-ում էին թուրքական հետախուզական ծառայության ղեկավար Իբրահիմ Քալընն ու ԱԳ նախարար Հաքան Ֆիդանը, որը մասնակցում էր ԱՄՆ-Թուրքիա ռազմավարական մեխանիզմի հանդիպմանը։
Թուրքական մամուլը տեղեկություններ է տարածում, որ մայիսի 9-ին էլ սպասվում է Թուրքիայի նախագահ Ռեջեփ Թայիփ Էրդողանի այցը Վաշինգտոն ու հանդիպումը ԱՄՆ նախագահ Ջո Բայդենի հետ։
Էմմա Չոբանյան
