Բաքվում հայտարարում են Ադրբեջանի անվտանգությանը սպառնացող վտանգի մասին՝ մեղադրելով Արևմուտքին

Միջազգային ասպարեզում տեղի ունեցող գործընթացները չեն շրջանցում Ադրբեջանին, և գաղտնիք չէ, որ այսօր էլ երկրում կայունությանն ու անվտանգությանը սպառնացող վտանգ կա։ Այս մասին ադրբեջանական պարբերականներից մեկում հրապարակված հոդվածում գրել է Ադրբեջանի Պետական անվտանգության ծառայության պետ Ալի Նագիևը։

Նա նշել է, որ ներկա աշխարհաքաղաքական իրավիճակն ուղեկցվում է ռուս-ուկրաինական պատերազմով և այլ արյունալի բախումներով։ Այն իր հերթին «ոչ միայն լուրջ ազդեցություն է թողնում աշխարհակարգի վրա, այլև հանգեցնում է ավելի բարդ գործառնական միջավայրի»։

«Մեր հանրապետության՝ օրեցօր աճող հեղինակությունը գլոբալ մասշտաբով, ներառյալ՝ այն բարենպաստ պայմանները, որոնք ստեղծված են Հայաստանի և Ադրբեջանի միջև խաղաղության պայմանագրի ստորագրման համար, լրջորեն մտահոգում են մի շարք արևմտյան երկրների, շրջանակների, որոնց նպատակը տարածաշրջանում կայունության և խաղաղության ապահովումը չէ, և որոնք գործում են երկու երկրների սահմանին «դիտորդական առաքելություն» անվան տակ (նկատի ունի ՀՀ-ում տեղակայված ԵՄ դիտորդական առաքելությունը – խմբ․)»,- գրել է Նագիևը։

Նա հավելել է, որ դա, իբր, «մտահոգում է հատկապես Ֆրանսիային, որը միջնորդական առաքելություն էր ստանձնել Ղարաբաղյան հիմնախնդրի կարգավորման գործընթացում, սակայն փաստորեն միակողմանի դիրքորոշմամբ երկար տարիներ հովանավորել է Հայաստանին և նրան ցուցաբերել համակողմանի աջակցություն»։

Հավելենք, որ Արևմուտքի, հատկապես՝ ՀՀ-ում ԵՄ առաքելության ու Ֆրանսիայի դեմ տարվող Բաքվի արշավի շրջանակում նախօրեին էլ Ադրբեջանի ԱԳՆ-ն էր հերթական հայտարարությունը տարածել՝ նշելով, թե ԵՄ դիտորդական առաքելությունը, իբր, «օգտագործվում է որպես հակաադրբեջանական քարոզչության գործիք»։

Էմմա Չոբանյան