Մոսկվայում խստացրել են ներգաղթյալների նկատմամբ վերահսկողությունը

Օտարերկրյա քաղաքացիների կողմից Ռուսաստան մուտքի կանոնների խախտման դեպքերի վերաբերյալ Մոսկվայի դատարանների վճիռների թիվը (ՌԴ Վարչական իրավախախտումների վերաբերյալ օրենսգրքի 18.8-րդ հոդված) ցույց է տալիս զգալի աճ «Կրոկուս սիթի հոլլ»-ի վրա հարձակումից հետո: Երկուշաբթի առավոտից գրանցվել է նման 784 դեպք, մինչդեռ անցած ամբողջ շաբաթվա ընթացքում՝ 1106 դեպք։

Մոսկվայի դատարանները որոշումներ են ընդունում (որպես կանոն՝ բոլորն էլ ավարտվում են խախտողին երկրից արտաքսելու որոշմամբ) առանց անձնագրային տվյալների ներկայացման, ուստի խախտողների քաղաքացիության ճշգրիտ վերլուծությունն անհնար է։

Այլ ապացույցներ կան, որ ոստիկանությունը խստացրել է անձնագրային ստուգումները միգրանտների շրջանում և մեծ ուշադրություն է դարձնում Տաջիկստանի քաղաքացիներին։ Փաստաբաններից մեկը, որը հաճախ է աշխատում այս երկրից հաճախորդների հետ, անանունության պայմանով BBC-ին ասել է, որ միայն երկուշաբթի օրը Մոսկվայի շրջանային դատարաններից մեկում ավելի քան 100 մարդ էր սպասում այս հոդվածով գործերի քննմանը:

«Ոստիկանությունը բռնում է գրեթե բոլոր միգրանտներին փողոցներում, հատկապես, եթե նրանք ունեն տաջիկական անձնագրեր։ Բոլորին տանում են բաժին, ստուգում, հետո մի մասին բաց են թողնում»,- պնդում է նա։

Տաջիկստանի սփյուռքի ներկայացուցիչներն արտաքսման որոշումների ալիք են ակնկալում ահաբեկչության մեջ մեղադրվողների ձերբակալության ֆոնին. «Կրոկուս սիթի հոլլի» վրա հարձակման գործով ձերբակալված ութից յոթը, պարզվել է, Տաջիկստանից են։