Քաղաքականություն
27.03.2024 | 22:28
Ղազախստանում ջրհեղեղների շրջանը շարունակվում է։ Երկրի Արտակարգ իրավիճակների նախարարության տվյալներով՝ Ակտոբեի Մուգալժար շրջանի Ժագաբուլակ գյուղում «օդի ջերմաստիճանի բարձրացման և ինտենսիվ ձնհալքի պատճառով» առնվազն երկու բակային տարածք հեղեղվել է։ Ժեմ գետի ջրի մակարդակի բարձրացման սպառնալիքի պատճառով մոտակա շրջաններից տարհանվել է 74 մարդ, այդ թվում՝ 30 երեխա, փոխանցում է Current Time-ը։
Հաղորդվում է նաև, որ Աբայի շրջանի Այագոզ վարչական կենտրոնում Այագոզա գետի վարարման հետևանքով հինգ կենցաղային հողատարածք է հեղեղվել։
Ցելինոգրադի շրջանի Կոյանդի գյուղում ջրի տակ են անցել երեք բնակելի առանձնատուն և երկու բնակելի ժամանակավոր շինություն։ Տեղի բնակիչները մարտի 26-ի երեկոյան փակել են ճանապարհը՝ պահանջելով տեղական արտակարգ իրավիճակ սահմանել։ Դատելով սոցցանցերի տեսանյութերից՝ Արագ արձագանքման հատուկ ջոկատները ժամանել են բողոքի ակցիայի վայր։ Կարճ ժամանակ անց մարդիկ ցրվել են։
Ուրալսկում ջրհեղեղների պատճառով ջրի տակ են անցել տեղի քաղխորհրդի, քաղաքային դատարանի և երկաթուղային կայարանի շենքերը, մանկական հիվանդանոցը, մարզադահլիճը։ Քաղաքային խորհուրդը հայտնել է նաև քաղաքի 18 մասնավոր և հինգ բազմաբնակարան շենքերի հեղեղվելու մասին։
