24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
ՌԴ-ն բախվում է Չինաստանից, Թուրքիայից և ԱՄԷ-ից նավթի վճարումների ուշացումների․ Reuters
Քաղաքականություն
27.03.2024 | 16:50
Ռուսական նավթային ընկերություններին հումքի և վառելիքի վճարումների մինչև մի քանի ամիս ուշացումներ են սպառնում, քանի որ Չինաստանի, Թուրքիայի և Արաբական Միացյալ Էմիրությունների բանկերն ավելի զգուշավոր են դառնում ԱՄՆ-ի երկրորդական պատժամիջոցներից։ Այս մասին Reuters-ին ասել է իրավիճակին ծանոթ 8 աղբյուր։
Վճարումների ուշացումները նվազեցնում են Կրեմլի եկամուտները և դրանք դարձնում անկայուն՝ թույլ տալով Վաշինգտոնին հասնել պատժամիջոցների երկակի նպատակին՝ խափանել փողի հոսքը Կրեմլ, որպեսզի պատժի Մոսկվային ուկրաինական պատերազմի համար՝ առանց գլոբալ էներգետիկ հոսքերը խաթարելու։
Ըստ աղբյուրների՝ Չինաստանի, ԱՄԷ-ի և Թուրքիայի մի քանի բանկեր վերջին շաբաթների ընթացքում ուժեղացրել են պատժամիջոցների պահպանման պահանջները, ինչը հանգեցրել է Մոսկվա դրամական փոխանցումների հետաձգմանը կամ նույնիսկ մերժմանը։ Նշվում է, որ բանկերը, զգուշանալով ԱՄՆ երկրորդական պատժամիջոցներից, սկսել են խնդրել իրենց հաճախորդներին գրավոր երաշխիքներ տրամադրել, որ ԱՄՆ-ի SDN (հատուկ նշանակված անձանց) ցուցակից որևէ անձ կամ կազմակերպություն ներգրավված չէ գործարքի մեջ կամ վճարման շահառու չէ:
Աղբյուրները խնդրել են չհրապարակել իրենց անունները՝ ելնելով հարցի զգայունությունից, քանի որ իրենց թույլ չեն տալիս խոսել լրատվամիջոցների հետ։
Ըստ երկու աղբյուրի՝ ԱՄԷ-ում First Abu Dhabi Bank (FAB) և Dubai Islamic Bank (DIB) բանկերը կասեցրել են ռուսական ապրանքների առևտրի հետ կապված մի քանի հաշիվներ։
ԱՄԷ-ի Mashreq բանկը, թուրքական Ziraat և Vakifbank, չինական ICBC և Bank of China բանկերը դեռևս իրականացնում են վճարումները, սակայն դրանք մշակելու համար շաբաթներ կամ ամիսներ են պահանջվում։
Mashreq բանկը հրաժարվել է մեկնաբանություններից, վերոնշյալ մյուս բանկերը չեն պատասխանել լրատվամիջոցի մեկնաբանությունների հարցումներին։
Կրեմլի խոսնակ Դմիտրի Պեսկովը, պատասխանելով չինական բանկերի կողմից վճարումները դանդաղեցնելու մասին հարցին, ասել է, որ դրանց հետ կապված խնդիրներ կան։
«Իհարկե, ԱՄՆ-ի և Եվրամիության աննախադեպ ճնշումը Չինաստանի վրա շարունակվում է։ Դա, իհարկե, որոշակի խնդիրներ է ստեղծում, բայց չի կարող խոչընդոտ դառնալ (Չինաստանի հետ) մեր առևտրատնտեսական հարաբերությունների հետագա զարգացման համար»,- ասել է նա։
