Մոլդովան Ադրբեջանի լիազորությունների կասեցման հարցով դիմել է ԵԽԽՎ-ին

Ադրբեջանը շարունակում է իր հետ սերտ կապեր ունեցող երկրների միջոցով ԵԽԽՎ-ում լոբբինգ իրականացնել՝ իր դեմ կիրառված սահմանափակումները վերացնելու համար։ Այս անգամ ԵԽԽՎ-ում Մոլդովայի պատվիրակությունն է Բաքվի հետ կապված նամակ հղել կառույցին, գրում են ադրբեջանական լրատվամիջոցները։

Դրանում պատվիրակությունը ԵԽԽՎ-ին և Ադրբեջանի Միլլի Մեջլիսին կոչ է արվում համագործակցել՝ կազմակերպության և Ադրբեջանի միջև անջրպետը վերացնելու համար, որն առաջացել է 2024 թվականի հունվարին ԵԽԽՎ նստաշրջանում ընդունված որոշումից հետո։

Նամակում ասվում է, որ Ադրբեջանը, ինչպես և անդամ մյուս պետությունները, աջակցում է ԵԽԽՎ-ում պատվիրակության միջոցով կազմակերպության արժեքների և սկզբունքների առաջմղմանը, ինչպես նաև ընդգծում է ԵԽԽՎ-ում միջխորհրդարանական երկխոսության միջոցով բոլոր խնդիրների լուծման կարևորությունը՝ Եվրոպայում անվտանգության և խաղաղության համար լուրջ մարտահրավերների  շրջանում։

Նշվում է նաև, որ ԵԽԽՎ-ի աշխատանքներին ադրբեջանական պատվիրակության չմասնակցելը երկարաժամկետ օգուտ չի բերել ո՛չ կազմակերպությանը, ո՛չ անդամ երկրներին։

Հիշեցնենք՝ հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։ Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր՝ Ալբանիայից։

Էմմա Չոբանյան