03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Մոսկվայում հարձակման երկու կասկածյալները Ստամբուլից ՌԴ են մեկնել նույն չվերթով. AFP
Քաղաքականություն
27.03.2024 | 13:34
Մոսկվայում համերգասրահի վրա հարձակման կասկածյալներից երկուսը՝ Տաջիկստանի քաղաքացիներ Ռաչաբալիզոդա Սաիդաքրամին և Շամշիդին Ֆարիդունին, «ազատորեն» Թուրքիայից մեկնել են Ռուսաստան, քանի որ նրանց ձերբակալելու օրդեր չի տրվել: Այս մասին AFP-ին հայտնել է թուրք պաշտոնյաներից մեկը՝ անանունության պայմանով։
Պաշտոնյան ասել է, որ երկուսն էլ հարձակումից անմիջապես առաջ որոշ ժամանակ անցկացրել են Թուրքիայում և Ստամբուլից Ռուսաստան են մեկնել նույն չվերթով։
ԻԼԻՊ-ը հայտարարել է, որ պատասխանատու է մոսկովյան հարձակման համար: ՌԴ նախագահ Վլադիմիր Պուտինն իր հերթին երկուշաբթի առաջին անգամ խոստովանել է, որ համերգասրահում տեղի ունեցած հարձակման հետևում կանգնած են «արմատական իսլամիստները», սակայն ենթադրություն է հայտնել, որ նրանք կապված են Ուկրաինայի հետ:
Թուրքական իշխանությունները պարզել են, որ կասկածյալներից մեկը՝ Ֆարիդունին, փետրվարի 20-ին մեկնել է Թուրքիա, իսկ մարտի 2-ին վերադարձել Ռուսաստան Ստամբուլի օդանավակայանով։ Փետրվարի 21-ին կասկածյալը տեղավորվել է Ստամբուլի Ֆաթիհ թաղամասի հյուրանոցներից մեկում և վեց օր անց հեռացել:
Ըստ թուրք պաշտոնյայի՝ նախնական հարցաքննության ժամանակ նա խոստովանել է, որ մեկնել է Թուրքիա, քանի որ Ռուսաստանում իր մուտքի արտոնագրի ժամկետը լրացել է։ Փետրվարի 23-ին Ֆարիդունին ութ անգամ հրապարակում է արել սոցիալական ցանցում, որտեղ նշված է «Աքսարայ Ստամբուլ», իսկ լուսանկարներում, ըստ երևույթին, ցուցադրված է Ֆաթիհ մզկիթը։
Մյուս կասկածյալը Ստամբուլ է ժամանել հունվարի 5-ին, նույն օրն իջևանել է Ֆաթիհ հյուրանոցում և հեռացել հունվարի 21-ին։ Ըստ աղբյուրի՝ այնուհետև մարտի 2-ին նա վերադարձել է Մոսկվա Ֆարիդունիի հետ նույն չվերթով։
