23.11.2024 | 19:00
Այսօր չկան կիրթ մեկենասներ, հայ կոմպոզիտորները ճանաչելի չեն դրսում, պետությունը մեծ անելիք ունի. Սաթյան. ՏԵՍԱՆՅՈՒԹ
Բլինքենը նախազգուշացրել է Իսրայելին՝ Ռաֆահում ռազմական գործողություն չսկսել
Քաղաքականություն
26.03.2024 | 15:45
ԱՄՆ վարչակազմը կրկին զգուշացրել է Իսրայելին Գազայի հատվածի հարավում գտնվող Ռաֆահ քաղաքում լայնածավալ ցամաքային ռազմական գործողության դեմ։ ԱՄՆ Պետքարտուղարության փոխանցմամբ՝ պետքարտուղար Էնթոնի Բլինքենը Վաշինգտոնում Իսրայելի պաշտպանության նախարար Յոավ Գալանտի հետ հանդիպման ժամանակ կրկին դեմ է արտահայտվել Ռաֆահում լայնածավալ ռազմական գործողությանը, ինչը, ըստ նրա, միայն կբարդացնի այս քաղաքում ապաստանած ավելի քան 1,4 միլիոն պաղեստինցի փախստականների՝ առանց այն էլ ծանր վիճակը, գրում է DW-ի ռուսական ծառայությունը։
Բլինքենն ընդգծել է, որ Ռաֆահում ռազմական գործողություն իրականացնելու այլընտրանքներ կան, որոնք կապահովեն ինչպես Իսրայելի անվտանգության շահերը, այնպես էլ պաղեստինցի խաղաղ բնակիչների պաշտպանությունը։
Սպիտակ տունը երկար ժամանակ քննադատում է Ռաֆահում ցամաքային գործողություն իրականացնելու՝ Իսրայելի մտադրությունը։ ԱՄՆ նախագահ Ջո Բայդենը նույնիսկ բացահայտորեն պահանջել է Իսրայելի ղեկավարությունից պատվիրակություն ուղարկել Վաշինգտոն՝ քննարկելու Ռաֆահի հարձակման հետ կապված մտահոգությունները և Իսրայելին տեղեկացնելու հնարավոր այլընտրանքների մասին։
Իսրայելի վարչապետ Բենիամին Նեթանյահուն մարտի 25-ին վերջին պահին չեղարկել է իր բանագնացի այցը Միացյալ Նահանգներ։ Դա տեղի է ունեցել այն բանից հետո, երբ ՄԱԿ-ի Անվտանգության խորհուրդն ԱՄՆ-ի աջակցությամբ ընդունել է Իսրայելի վրա ճնշումը մեծացնող բանաձև։ Դրանում Անվտանգության խորհուրդը Գազայի հատվածում վեց ամսվա պատերազմի ընթացքում առաջին անգամ անհապաղ հրադադարի կոչ է արել։
Գալանտի այցը Միացյալ Նահանգներ վաղուց էր ծրագրված և կապված չէր Նեթանյահուի բանագնացի այցի հետ։ Մարտի 25-ին Յոավ Գալանտը հանդիպել է նաև ԱՄՆ ազգային անվտանգության հարցերով խորհրդական Ջեյք Սալիվանի հետ։
Գալանտի բանակցությունները ԱՄՆ պաշտպանության նախարար Լլոյդ Օսթինի հետ նախատեսված են մարտի 26-ին։
