ՌԴ ՊՆ-ն ընդունել է, որ Ուկրաինայի էներգետիկ օբյեկտներն են եղել զանգվածային հրթիռակոծության թիրախը

ՌԴ ՊՆ-ն մեկնաբանել է Ուկրաինայի վրա իրականացված զանգվածային հարձակումը՝ հաստատելով ոչ միայն բուն հարձակումը, այլև այն, որ թիրախների թվում են եղել էներգետիկ ենթակառուցվածքները, գրում է BBC-ի ռուսական ծառայությունը։

«Այսօր զանգվածային հարված է հասցվել էներգետիկ օբյեկտներին, ռազմարդյունաբերական համալիրին, երկաթուղային հանգույցներին, զինանոցներին, Ուկրաինայի զինված ուժերի տեղակայման կետերին և օտարերկրյա վարձկաններին»,- ասվում է ՊՆ հաղորդագրության մեջ։

Ուկրաինայի իշխանություններն ավելի քան 150 հրթիռների և անօդաչու թռչող սարքերի համատեղ հարձակումն անվանել են վերջին ժամանակների ամենամեծ հարձակումն Ուկրաինայի էներգետիկ ենթակառուցվածքների վրա։ Բացի կարևոր ենթակառուցվածքային օբյեկտներից, ներառյալ՝ Դնեպրի հիդրոէլեկտրակայանը, տուժել են բնակելի շենքեր։

Հայտնի է, որ վեց խաղաղ բնակիչ է զոհվել Զապորոժիեում, Խմելնիցկիում և Դնեպրի հիդրոէլեկտրակայանի մոտ։

Ռուսական կողմը պնդում է, թե հարվածի հետևանքով «ապակազմակերպվել է զենք, ռազմական տեխնիկա և զինամթերք արտադրող և վերանորոգող արդյունաբերական ձեռնարկությունների գործունեությունը»։ Բացի այդ, ՆԱՏՕ-ի երկրներից Ուկրաինային մատակարարված օտարերկրյա ռազմական տեխնիկան, իբր, «ոչնչացվել է»։

Նշվում է, որ մարտի 16-22-ը, «ի պատասխան ՌԴ տարածքի հրետակոծության», «բնակավայրերը ճեղքելու և գրավելու փորձերի», ռուս զինվորականները նաև «49 պատասխան հարվածներ են հասցրել Ուկրաինայում գտնվող թիրախներին»։