«Մենք պատերազմի մեջ ենք»․ Պեսկովը դադարել է Ուկրաինայի դեմ պատերազմը «հատուկ ռազմական գործողություն» անվանել

Ռուսաստանի ներխուժումն Ուկրաինա, Արևմուտքի միջամտությունից հետո, «հատուկ ռազմական գործողությունից» վերածվել է իսկական պատերազմի: Այս մասին «Аргументы и факты»-ին ասել է ՌԴ նախագահի մամուլի քարտուղար Դմիտրի Պեսկովը, գրում է Meduza-ն։

«Մենք գտնվում ենք պատերազմի իրավիճակում։ Այո՛, դա սկսվեց որպես «հատուկ ռազմական գործողություն», սակայն երբ յդ խմբակը ձևավորվեց, երբ հավաքական Արևմուտքը սկսեց լինել Ուկրաինայի կողմում, մեզ համար այն դարձավ պատերազմ։ Եվ յուրաքանչյուրը դա պետք է հասկանա՝ իր ներքին մոբիլիզացիայի համար»,- նշել է Պեսկովը։

Կրեմլի խոսնակն ասել է, թե Ռուսաստանը պատերազմում կշարունակի գործել այնպես, որ Ուկրաինան չկարողանա սպառնալ իր քաղաքացիներին և տարածքներին, քանի որ Կրեմլը չի ​​կարող թույլ տալ, որ իր սահմաններում գոյություն ունենա մի պետություն, որը մտադիր է օգտագործել ցանկացած մեթոդ ՌԴ-ից Ղրիմն ու Ուկրաինայի 4 շրջանները հետ վերցնելու համար։

«Ինչի՞ մասին է խոսում նախագահը։ Մենք ունենք չորս նոր դաշնային սուբյեկտներ: Եվ մեզ համար գլխավորն այս շրջանների բնակիչներին պաշտպանելն ու այդ շրջանների տարածքի ազատագրումն է, որը ներկայում դե ֆակտո օկուպացված է Կիևի ռեժիմի կողմից»,- հայտարարել է Պեսկովը։

Ավելի ուշ ճեպազրույցում Պեսկովին հարցրել են՝ արդյո՞ք իր խոսքերը նշանակում են, որ իրավական կերպով «հատուկ ռազմական գործողությունը» փոխվում է։

«Դա որևէ իրավական փոփոխության հետ կապված չէ։ Սա դե յուրե հատուկ ռազմական գործողություն է, բայց դե ֆակտո մեզ համար այն վերածվել է պատերազմի այն բանից հետո, երբ հավաքական Արևմուտքը գնալով ուղղակիորեն մեծացնում է հակամարտությունում իր ներգրավվածության մակարդակը»,- ասել է Կրեմլի խոսնակը։