25.06.2026 | 12:19
ԵՏՄ-ն ինքնալուծարման մասին է հայտարարում, եթե ԵՏՄ մի անդամ կարա մյուսի նկատմամբ սենց որոշում կայացնի․ ՏԵՍԱՆՅՈՒԹ
ԱՄՆ-ը խնդրել է Ուկրաինային դադարեցնել հարձակումները ՌԴ-ի նավթավերամշակման գործարանների վրա․ FT
Քաղաքականություն
22.03.2024 | 15:45
ԱՄՆ իշխանությունները կոչ են արել Ուկրաինային՝ դադարեցնել հարձակումները ՌԴ էներգետիկ ենթակառուցվածքի ուղղությամբ։ Այս մասին հայտնում է Financial Times-ը՝ վկայակոչելով իրազեկ աղբյուրներին, գրում է Meduza-ն։
Լրատվամիջոցի զրուցակիցների խոսքով՝ Վաշինգտոնը մտավախություն ունի, որ ռուսական նավթավերամշակման գործարանների վրա հարվածները կարող են հանգեցնել նավթի համաշխարհային գների աճին, ինչպես նաև հրահրել Մոսկվայի կողմից պատասխան քայլեր։
FT-ն գրում է, որ ԱՄՆ վարչակազմն այս մասին բազմիցս զգուշացրել է Ուկրաինայի անվտանգության ծառայության և պաշտպանության նախարարության գլխավոր հետախուզական վարչության բարձրաստիճան պաշտոնյաներին։ Երկու ստորաբաժանումներն էլ լայնամասշտաբ պատերազմի սկզբից ի վեր անշեղորեն ընդլայնում են իրենց սեփական անօդաչու թռչող սարքերի ծրագրերը՝ հարվածելու ռուսական թիրախներին ցամաքում, ծովում և օդում:
Աղբյուրներից մեկն ասել է, որ Սպիտակ տունն ավելի ու ավելի է հիասթափվում Ռուսաստանի արևմտյան նավթավերամշակման գործարանների, տերմինալների, պահեստների և պահեստարանների վրա ուկրաինական անօդաչու սարքերի հարձակումներից: Վաշինգտոնը նաև անհանգստացած է շարունակվող հարձակումներին Մոսկվայի հնարավոր պատասխանից։ Սպիտակ տանը կարծում են, որ արդյունքում կարող է տուժել էներգետիկ ենթակառուցվածքը, որին հենվում է Արևմուտքը, օրինակ՝ Կասպյան խողովակաշարերի կոնսորցիումը, որով իրականացվում են ղազախական նավթի մատակարարումները։
Ուկրաինական ռազմական հետախուզության տվյալներով՝ 2022 թվականից ի վեր եղել է առնվազն 12 հարձակում Ռուսաստանի խոշոր նավթավերամշակման գործարանների վրա, որից առնվազն 9-ը՝ 2024 թվականին։
