26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
Կիևն էներգետիկ համակարգին հասցված ռուսական հարվածներն անվանել է ամենախոշորը պատերազմի սկզբից ի վեր
Քաղաքականություն
22.03.2024 | 14:38
Մարտի 22-ին Ուկրաինայի էներգահամակարգին հասցված հարվածները պատերազմի ամբողջ ժամանակաշրջանում ամենամեծ հարձակումն էր։ BBC-ի ռուսական ծառայության փոխանցմամբ՝ այս մասին հայտարարել է «Ուկրէներգոյի» ղեկավար Վլադիմիր Կուդրիցկին։
Նրա խոսքով՝ հարձակումներն իրականացվել են Ուկրաինայի տարբեր շրջանների, ՋԷԿ-երի և հիդրոէլեկտրակայանների, ինչպես նաև «Ուկրէներգո»-ի ղեկավարած հիմնական ենթակայանների վրա։
Խարկովում վնասի մասշտաբներն ավելի մեծ են, քան մյուս շրջաններում, նշել է Կուդրիցկին։ Այստեղ թիրախները եղել են ինչպես արտադրական, բարձրավոլտ ենթակայանները, այնպես էլ բաշխիչ օպերատորների ենթակայանները։ Տեղի իշխանություններն ավելի վաղ հայտնել էին, որ շրջկենտրոնն ամբողջությամբ մնացել է առանց էլեկտրականության։
«Ցավոք, Ուկրաինայի տարբեր շրջաններում, հիմնականում՝ Դնեպրի ձախ ափին, էներգակիրների մատակարարման սահմանափակում կա»,- հավելել է «Ուկրէներգո»-ի ղեկավարը։
Մեկնաբանելով Դնեպրի հիդրոէլեկտրակայանի հրթիռակոծությունից հասցված վնասը՝ նա ասել է. «Առայժմ ամբարտակի փլուզման վտանգ չկա, վնասի կարգավիճակը ճշտվում է և վերջնականապես պարզ կլինի մի քանի ժամից»։
Ավելի վաղ Ուկրաինայի էներգետիկայի նախարար Գերման Գալուշչենկոն հայտարարել էր, որ Ռուսաստանն իրականացրել է «վերջին ժամանակների ամենամեծ հարձակումն ուկրաինական էներգետիկ համակարգի վրա»։
