24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Թիվ մեկ օրակարգային հարցն այդ խնդիրը չէ. Վահե Էնֆիաջյանը՝ Սերժ Սարգսյանի վարչապետ լինելու մասին
10.07.2017 | 13:51
Ազգային ժողովի «Ծառուկյան» խմբակցության քարտուղար Վահե Էնֆիաջյանի պնդմամբ՝ իր թիմակցի՝ ԱԺ փոխխոսնակ Միքայել Մելքումյանի խոսքերը խեղաթյուրվել են: Այս մասին այսօր խորհրդարանում պատասխանելով Factor-ի հարցին՝ արդյոք ի՞նքն էլ խնդիր չի տեսնում, որ 2018 թվականին Սերժ Սարգսյանը լինի վարչապետ՝ ասաց Վահե Էնֆիաջյանը:
Հիշեցնենք՝ օրերս Միքայել Մելքումյանը լրատվամիջոցներից մեկի հետ զրույցում նշել էր. «Վարչապետի փոփոխությունը այս պահին ակտուալ չեմ համարում։ Դա քաղաքական մեծամասնության խնդիրն է։ Կառավարության ծրագրի իրականացման կրողը քաղաքական մեծամասնությունն է, անձերից վերանանք, ինքը կգտնի՝ ով կլինի։ Ես չեմ տեսնում որևէ խնդիր, որ Սերժ Սարգսյանը 2018–ից լինի վարչապետ»:
«Միքայել Մելքումյանի խոսքը որոշակիորեն խեղաթյուրված էր: Պետք է իրադարձություններին սպասել և ճիշտ ժամանակին կարծիք հայտնել: Այս պահի դրությամբ ՀՀ քաղաքական դաշտում թիվ մեկ օրակարգային հարցն այդ խնդիրը չէ: Երբ գա այն ժամանակը, որ պետք լինի «Ծառուկյան» խմբակցությունն իր դիրքորոշումը հայտնի, ամեն ինչ ճիշտ ժամանակին կարվի»,- Factor.am-ի հարցին ի պատասխան՝ պարզաբանեց Էնֆիաջյանը:
Ի դեպ, անձամբ Միքայել Մելքումյանը հրաժարվեց պարզաբանել, թե ինչ նկատի ունեն՝ պնդելով, որ իր խոսքերը խեղաթյուրվել են:
Մանրամասները՝ տեսանյութում:
Շողիկ Գալստյան
