07.10.2026 | 10:15
Հայաստանի ներկայացուցիչները ադրբեջանցի և միջազգային փորձագետների հետ Լոնդոնում մասնակցել են աշխատաժողովի
Ադրբեջանում կոռուպցիան բացահայտող Abzas Media-ն միջազգային մրցանակի է արժանացել․ լրատվամիջոցի մի քանի աշխատակից բանտում է
Քաղաքականություն
22.03.2024 | 12:52
Պրահայում անցկացված Jeden svět/One World միջազգային մարդու իրավունքների վավերագրական ֆիլմերի փառատոնի ընթացքում «Homo Homini» 2023 թվականի մարդու իրավունքների մրցանակը հանձնվել է ադրբեջանական «Abzas Media» անկախ լրատվամիջոցին։
Ադրբեջանի նախագահ Իլհամ Ալիևի, նրա ընտանիքի անդամների ու տարբեր պաշտոնյաների կոռուպցիոն գործարքների բացահայտման համար իշխանությունների կողմից հետապնդումների ենթարկվող AbzasMedia-ն մրցանակին է արժանացել անկախ լրագրության և մարդու իրավունքների պաշտպանության գործում ունեցած ավանդի համար։
People in Need կազմակերպության հիմնադրած մրցանակը «Abzas Media-ի» ժամանակավոր գլխավոր խմբագիր Լեյլա Մուստաֆաևային հանձնել է լեհ հայտնի կինոռեժիսոր Ագնեշկա Հոլանդը։
Արարողության ժամանակ ունեցած ելույթում Մուստաֆաևան խոսել է Ադրբեջանում մարդու իրավունքների վիճակի և լրագրողների նկատմամբ ճնշումների մասին՝ կոչ անելով Չեխիայի կառավարությանը բռնագրավել երկրում ադրբեջանցի պաշտոնյաների ունեցվածքը։
«Ադրբեջանի կառավարությունը լրագրողների կողմից հրապարակված կոռուպցիոն հետաքննության վերաբերյալ ոչ մի քրեական գործ չի հարուցել, փոխարենը ձերբակալել է լրագրողներին և իր հանցագործությունները պրոյեկտել լրագրողների վրա»,- ասել է Մուստաֆաևան։
Նշենք, որ նախորդ տարեվերջից Ադրբեջանի իշխանությունները բռնաճնշումների նոր ալիք են սկսել անկախ լրագրողների ու ընդդիմադիր նկատմամբ։ Ձերբակալված լրագրողների թիվը հասնում է շուրջ երկու տասնյակի։
2023 թվականի նոյեմբերից կալանավորվել են Ադրբեջանի իշխանությունների կառուպցիոն գործերը հետաքննող Abzas Media-ի տնօրեն Ուլվի Հասանլին, փոխտնօրեն Մուհամմեդ Կեկալովը, գլխավոր խմբագիր Սևինջ Վաքըֆքիզին, լրագրող Նարգիզ Աբսալամովան, լրագրող Հաֆիզ Բաբալին (Թուրան գործակալության տնտեսական բաժնի խմբագիրը), լրագրող Էլնարա Գասիմովան։ Լրատվամիջոցն այժմ գործունեությունը շարունակում է Եվրոպայից՝ նոր թիմով։
Էմմա Չոբանյան
