08.11.2026 | 00:09
Կրակոցներ Կրակովի կենտրոնում․ զոհերի թիվը հասել է 6-ի, կա 15 վիրավոր
ՆԱՏՕ-ի ռազմական պատվիրակությունը պատերազմի մեկնարկից ի վեր առաջին անգամ ժամանել է Կիև
Քաղաքականություն
21.03.2024 | 18:09
Ուկրաինայի դեմ ռուսական լայնամասշտաբ պատերազմի մեկնարկից ի վեր առաջին անգամ Կիև է ժամանել ՆԱՏՕ-ի ռազմական կոմիտեի ղեկավար, ծովակալ Ռոբ Բաուերը, գրում է DW-ի ռուսական ծառայությունը։
«Իմ՝ ՆԱՏՕ-ի առաջին ռազմական պատվիրակության այցը, որը եղել է Ուկրաինա լայնամասշտաբ ներխուժումից հետո, հանդիսանում է վկայությունն այն բանի, որ ՆԱՏՕ-ն և Ուկրաինան մոտ են ավելի, քան երբևէ»,- ասել է նա՝ ելույթ ունենալով Կիևի անվտանգության ֆորումում։
Նա «խորին հարգանք է հայտնել ուկրաինացիների կողմից մարտի դաշտում և դրանից դուրս ցուցաբերած քաջության և ուժի համար»: Բաուերի խոսքով՝ օրեցօր Ուկրաինան և ՆԱՏՕ-ն ավելի են մերձենում և միասին անհրաժեշտ ջանքեր են գործադրում ռուսական ագրեսիայի թիրախ դարձած երկրի եվրաատլանտյան ինտեգրման ուղղությամբ։
«Շվեդիայի դրոշը միակ կապույտ և դեղին դրոշը չի լինի ՆԱՏՕ-ի կենտրոնակայանի դիմաց»,- ասել է նա։
Բաուերն ընդգծել է, որ Ռուսաստանի նախագահ Վլադիմիր Պուտինի նախաձեռնած ներխուժումը «երբեք կապված չի եղել Ուկրաինայի կամ ՆԱՏՕ-ի կողմից անվտանգության իրական սպառնալիքի հետ»։
«Այս պատերազմը կապված է նրա հետ, որ նախագահ Պուտինը վախենում է երկրագնդի ցանկացած ֆիզիկական զենքից շատ ավելի հզոր բանից՝ ժողովրդավարությունից: Եթե ուկրաինացիները կարողանան ունենալ իրական ժողովրդավարական իրավունքներ, ապա շուտով ռուսները նույնպես կցանկանան դրանք»,- նշել է նա։
ՆԱՏՕ-ի պաշտոնյան հավելել է, որ ռուսները, ձգտելով ուժ ցուցադրել, միայն թուլություն են ցուցաբերել։
«Ոչ մի քարոզչություն չի կարող թաքցնել այն ճշմարտությունը, որ նախագահ Պուտինը չի հասել իր ռազմավարական նպատակներից որևէ մեկին»,- ասել է Բաուերը՝ նշելով, որ ուկրաինացիները և Ուկրաինայի զինված ուժերը պայքարում են ազատության և քաղաքակրթության համար այնպես, որ «փոխել են ժամանակակից ռազմական գործերի շատ ասպեկտներ»։
Բաուերը վստահություն է հայտնել, որ կան բոլոր հիմքերը՝ վստահ լինելու Ուկրաինայի հաջողության հասնելու ունակության հարցում, և միակ բանը, որ նրան անհրաժեշտ է, գործընկերների կողմից է՛լ ավելի մեծ և անմիջական օգնությունն է։
«Ուկրաինայում ժամանակը չի չափվում օրերով, շաբաթներով կամ ամիսներով, այն չափվում է մարդկային կյանքերով»,- հավելել է նա։
ՆԱՏՕ-ի ներկայացուցիչը նաև նշել է, որ «պատմական լուրջ սխալ կլինի Պուտինին թույլ տալ հաղթել»՝ ընդգծելով,որ այս պատերազմի ելքը կորոշի աշխարհի ճակատագիրը։
