21.03.2026 | 20:02
ԱՄՆ-ի Հավայի նահանգում 5,5 հազար մարդ կտարհանվի ջրհեղեղի պատճառով
Ինչո՞ւ պետք է թանկանան. Ավանեսյանը՝ դեղերի գների և հնարավոր ստվերի մասին․ ՏԵՍԱՆՅՈՒԹ
21.03.2024 | 12:43
Առողջապահության նախարար Անահիտ Ավանեսյանը չի կարծում, թե էլեկտրոնային դեղատոմսերին անցումը կազդի դեղորայքի գնի վրա։ Կառավարության նիստից հետո կայացած ճեպազրույցում Factor TV-ն նախարարին հարց ուղղեց՝ արդյո՞ ք նոր համակարգի ներդրումը դեղերի թանկացման ռիսկեր չի պարունակում, կամ կա՞ն երաշխիքներ, որ չեն հայտնվեն անհատներ, որոնք առանց դեղատոմսի դեղ կվաճառեն, Ավանեսյանն արձագանքեց՝ ինչո՞ւ պետք է թանկանան դեղերը։
«Այն ութ դրամն էլ, որ ծախսվում էր թուղթ տպելու համար, հիմա չի ծախսվում։ Իսկ սև շուկա չի առաջանա, քանի որ պացիենտին տալիս են դեղատոմս, ցուցում, ու ինքը գնում ու դեղ է գնում»,- ասաց նա։ Նախարարը նաև հայտարարեց, որ էլեկտրոնային դեղատոմսերի համակարգի ներդրումից հետո խնդիրների մասին ահազանգերի քանակը նվազել է։
«Հարցերի տեղատարափը բավականին նվազել է, և այս շաբաթ նկատում ենք, որ շատ ավելի հանգիստ և առանց խնդիրների է ամեն ինչ գործում։ Մեզ համար շատ կարևոր են ձեր ահազանգերը, որպեսզի վեր հանենք առաջացած խնդիրներն ու հրատապ լուծումներ տանք, առաջ գնանք»,-շեշտեց Ավանեսյանը։
Հիշեցնենք` մարտի 1-ից էլեկտրոնային դեղատոմսերով վաճառվում է 470 անուն դեղ, որից 375-ը անվճար և արտոնյալ պայմաններով դեղերն են։ Էլեկտրոնային դեղատոմսերի համակարգում ներառվել է ՀՀ-ում գրանցված դեղերի 20 տոկոսը, իսկ ՀՀ-ում ընդհանուր առմամբ կա գրանցված 3 370 անուն դեղ։
2025 թվականի հունվարի 1–ից արդեն էլեկտրոնային տարբերակով կվաճառվի 2 566 անուն դեղ։ Մնացածը դեղերը ազատ կվաճառվեն, քանի որ ներառված չեն պարտադիր դեղատոմսով դուրս գրվելու ցանկում։
