ԵՄ-ին անդամակցությունը Թուրքիայի ռազմավարական նպատակն է․ Հաքան Ֆիդան

Եվրամիությանն անդամակցությունը մնում է Թուրքիայի ռազմավարական նպատակը։ Այս մասին հայտարարել է Թուրքիայի ԱԳ նախարար Հաքան Ֆիդանը Անկարայում Իսպանիայի իր պաշտոնակից Խոսե Մանուել Ալբարեսի հետ բանակցություններից հետո տեղի ունեցած ասուլիսում, գրում են թուրքական լրատվամիջոցները։

«ԵՄ-ին Թուրքիայի անդամակցության գործընթացը չափազանց կարևոր է՝ հարցը մի շարք երկրների նեղ քաղաքական օրակարգին թողնելու համար»,- ասել է Ֆիդանը։

Նա հույս է հայտնել, որ Անկարայի և ԵՄ կառույցների միջև հարաբերությունները կզարգանան ավելի «դրական օրակարգով՝ անկախ Եվրախորհրդարանի ընտրությունների արդյունքներից»։

Ֆիդանը նշել է ԵՄ անդամ երկրների կողմից «նախապես քաղաքական կամք դրսևորելու» անհրաժեշտությունը՝ կապված Թուրքիայի՝ ԵՄ-ին անդամակցելու գործընթացի հետ։ Նա հիշեցրել է, որ նման քաղաքական կամք դրսևորվել է 2004-2005 թվականներին։

«Սակայն ավելի ուշ մենք ականատես եղանք, որ այդ քաղաքական կամքը մաշվեց և աստիճանաբար վերացավ, և ԵՄ-ում բոլորովին այլ քաղաքական մթնոլորտ տիրեց Թուրքիայի վերաբերյալ»,- հայտարարել է Ֆիդանը։

Ըստ նրա՝ Անկարայի և Բրյուսելի միջև Մաքսային միության արդիականացման առաջընթացը, վիզային ռեժիմի ազատականացումը, առևտրային արտոնությունների տրամադրումը և կարգավորումն օգուտ կբերեն երկու կողմերին։ Ֆիդանը նշել է, որ որ Իսպանիան այն երկրների թվում է, որոնք ի սկզբանե անկեղծորեն աջակցել են Անկարայի՝ համայնքին անդամակցելու գործընթացին։

Նշվում է, որ բանակցությունների ընթացքում Թուրքիայի և Իսպանիայի արտգործնախարարները մանրամասն քննարկել են անվտանգության ոլորտում հնարավոր քայլերը, ինչպես նաև ՆԱՏՕ-ի շրջանակում սերտ համագործակցությունը։

«Որպես այս համագործակցության արտացոլում՝ Իսպանիան 2015 թվականից Ադանայում տեղակայում է Patriot մարտկոց: Սա համահունչ է ՆԱՏՕ-ի դաշինքի ոգուն։ Բացի այդ, որպես երկու դաշնակիցներ՝ մենք հավատարիմ ենք կոնկրետ նախագծերի միջոցով պաշտպանական արդյունաբերության ոլորտում մեր համագործակցության հետագա զարգացմանը»,-հայտարարել է Հաքան Ֆիդանը։