03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Սալիվանը Կիևում է․ նա կոչ է արել ուկրաինացիներին շարունակել «հավատալ ԱՄՆ-ին»
Քաղաքականություն
21.03.2024 | 11:52
Ուկրաինայի նախագահ Վլադիմիր Զելենսկին դրական է արտահայտվել Կիև այցելած ԱՄՆ ազգային անվտանգության հարցերով խորհրդական Ջեյք Սալիվանի հետ հանդիպման արդյունքների մասին, գրում է DW-ի ռուսական ծառայությունը։
«Շատ բովանդակալից, կոնկրետ խոսակցություն պաշտպանական համագործակցության և համատեղ քաղաքական արդյունքների մասին, որոնց մենք պետք է հասնենք։ Շնորհակալ եմ Ամերիկային մեր պետությանն ու ժողովրդին աջակցության համար, կենսականորեն կարևոր է, որ ամերիկյան ղեկավարությունն ուժեղ մնա միջազգային իրավունքի գերակայությունը պաշտպանելու գործում»,- ասել է Զելենսկին ժողովրդին ուղղված երեկոյան ուղերձում։
Նրա խոսքով՝ «Արևմուտքի վերաբերյալ կասկածներն» օգնում են Ռուսաստանի նախագահ Վլադիմիր Պուտինին, որին Զելենսկին «խելագար» է անվանել։
«Պուտինը պետք է պարտվի, և դա կյանքի ու մահվան հարց է ժողովրդավարական աշխարհի համար»,- ասել է նա։
Ավելի վաղ Ջեյք Սալիվանն Ուկրաինայի նախագահի գրասենյակի ղեկավար Անդրեյ Երմակի հետ համատեղ ճեպազրույցի ժամանակ համոզմունք էր հայտնել, որ «Ուկրաինան պետք է հաղթի»։
«Իսկ ի՞նչ է սա նշանակում: Նշանակում է, որ Ուկրաինան այս պատերազմից դուրս կգա ինքնիշխան, անկախ, ազատ, ունակ զսպելու ապագա ագրեսիան, ուժեղ, դինամիկ ժողովրդավարությամբ, խորը ժողովրդավարական ինստիտուտներով, տնտեսությամբ, որն աճում է ոչ միայն ավանդական ոլորտներում, այլև բարձր տեխնոլոգիաների, այն ոլորտներում, որտեղ դուք նորարարություն եք անում, և նույնիսկ ռուսական հարձակումների դեպքում դուք նորարարություն եք անում: Ահա թե ինչ է նշանակում հաղթել»,- ասել է Սալիվանը։
Նա ուկրաինացիներին կոչ է արել շարունակել «հավատալ ԱՄՆ-ին»։
«Մենք ձեր կողքին ենք եղել այս պատերազմի հենց սկզբից: Մենք հսկայական աջակցություն ենք ցուցաբերել և կշարունակենք դա անել ամեն օր մեզ հասանելի բոլոր միջոցներով»,- ընդգծել է Սպիտակ տան ներկայացուցիչը՝ վստահություն հայտնելով, որ ԱՄՆ նախագահ Ջո Բայդենը կհասնի Կոնգրեսի կողմից Կիևին հավելյալ օգնության մասին օրինագծի հաստատմանը։
Ուկրաինական լրատվամիջոցներն էլ ուշադրություն են հրավիրում այն փաստի վրա, որ Սալիվանը, բացատրելով, թե կոնկրետ որն է համարում Ուկրաինայի ապագա հաղթանակը, չի նշել Ռուսաստանի կողմից օկուպացված տարածքների վերադարձը։
