25.06.2026 | 11:32
Ուկրաինական ԱԹՍ-ների հարվածից Կրասնորդարում նավթաբազայում հրդեհ է բռնկվել
Ուկրաինա զորք ուղարկելու մասին խոսելիս Մակրոնը նկատի ուներ հրահանգիչներին․ Կուլեբա
Քաղաքականություն
20.03.2024 | 15:25
Ֆրանսիայի նախագահ Էմանուել Մակրոնը, խոսելով Ուկրաինա արևմտյան զորքեր ուղարկելու մասին, նկատի ուներ ուկրաինացի զինվորների համար հրահանգիչներին, հայտարարել է Ուկրաինայի ԱԳ նախարար Դմիտրի Կուլեբան օտարերկրյա լրագրողների հետ զրույցում, գրում է DW-ի ռուսական ծառայությունը։
«Երբ Մակրոնը խոսեց Ուկրաինա զորքեր ուղարկելու մասին, եվրոպացի առաջնորդները խուճապի մատնվեցին: Մակրոնը պարզապես նկատի ուներ, որ ուկրաինացի զինվորներին պատրաստելու հնարավորություն կա անմիջապես Ուկրաինայում, այլ ոչ թե նրա սահմաններից դուրս, ինչպես դա տեղի է ունենում հիմա»,- ասել է Կուլեբան։
Նա նաև նշել է, որ Կիևը երբեք չի խնդրել Արևմուտքին Ուկրաինա ուղարկել զինվորականների, քանի որ հպարտ է իր զինվորականներով։ Սակայն ուկրաինական բանակին անհրաժեշտ են ՀՕՊ համակարգեր, զինամթերք, ԱԹՍ-ներ ու հեռահար հրթիռներ՝ «օկուպացված տարածքներում ռուսական լոգիստիկան և հրամանատարությունը ոչնչացնելու, ինչպես նաև Ռուսաստանի տարածքում հարվածներ հասցնելու համար»։
«Ոչ ոք այնքան շատ չի ցանկանում խաղաղություն, որքան մենք, սակայն մենք ոչ մեկի վրա չենք հարձակվել և չունենք այլ ընտրություն՝ բացի պաշտպանվելուց»,- նշել է Կուլեբան։
Հավելենք, որ փետրվարի վերջին Կիևի աջակցության համաժողովում Մակրոնը չէր բացառել ՆԱՏՕ-ի անդամ երկրների ցամաքային ուժերն Ուկրաինա ուղարկելու հնարավորությունը։
