Քաղաքականություն
20.03.2024 | 11:23
Գիշերը ՌԴ Սարատովի մարզի Էնգելս քաղաքը, ինչպես նաև Բելգորոդի շրջանը ենթարկվել են անօդաչու թռչող սարքերի հարձակման։ Գրում է BBC-ի ռուսական ծառայությունը՝ հղում անելով տեղական իշխանություններին։
ՌԴ ՊՆ-ի տվյալներով՝ հակաօդային պաշտպանության համակարգերը Բելգորոդի շրջանի տարածքում խոցել են ուկրաինական 1 ԱԹՍ, ևս 4-ը՝ Սարատովի մարզում։ Սարատովի նահանգապետ Ռոման Բուգարսինը հայտնել է, որ տուժածներ ու ավերվածություններ չկան։
«Մոտ մեկ ժամ առաջ Էնգելսում ոչնչացվել է ԱԹՍ։ ՀՕՊ համակարգն աշխատել է ժամանակին ու արդյունավետ։ Նախնական տվյալներով՝ անկման հետևանքով ենթակառուցվածքներին վնաս չի հասցվել, ավերածություններ չեն եղել»,- գրել է նա տելեգրամի իր ալիքում։
Էնգելսի բնակիչները սոցիալական ցանցերում հայտնում են քաղաքում տեղի ունեցած պայթյունների շարքի մասին։
Ի դեպ, Էնգելսի շրջանում է տեղակայված Ռուսաստանի օդատիեզերական ուժերի «Էնգելս 2» բազան, որտեղ տեղակայված են ռուսական ռազմավարական ռմբակոծիչները, որոնք Ուկրաինայի ուղղությամբ գրոհներ են իրականացնում։ Ավիաբազան արդեն մի քանի անգամ ենթարկվել է հարձակման։ Ուկրաինական կողմը ԱԹՍ-ներով հարձակման մասին տեղեկություններ չի հաղորդում։
