11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Թրամփը հայտարարել է,որ ԱՄՆ-ն ՆԱՏՕ-ից դուրս չի բերի, «քանի դեռ եվրոպացիները վճարում են»
Քաղաքականություն
20.03.2024 | 13:10
ԱՄՆ նախագահի թեկնածու Դոնալդ Թրամփը հայտարարել է, որ իր հաղթանակի դեպքում երկիրը դուրս չի գա ՆԱՏՕ-ից, քանի դեռ դաշինքի եվրոպացի անդամներն «ազնվորեն» վճարում են իրենց տուրքերը։ Թրամփի այս խոսքերը հնչել են բրիտանական GB News հեռուստաալիքի եթերում՝ ի պատասխան հաղորդավար, Brexit կուսակցության նախկին առաջնորդ Նայջել Ֆարաջի հարցի, փոխանցում է DW-ի ռուսական ծառայությունը։
«Միացյալ Նահանգները պետք է վճարի իր արդար մասնաբաժինը և չպետք է վճարի ուրիշների համար»,- ընդգծել է Թրամփը։
Նա կարծիք է հայտնել, որ Հյուսիսատլանտյան դաշինքն «ավելի կարևոր» է եվրոպական երկրների, քան ԱՄՆ-ի համար։
«Մեր և որոշ խնդիրների միջև ընկած է օվկիանոս, մեծ, գեղեցիկ օվկիանոս»,- նշել է ամերիկացի քաղաքական գործիչը։
Ավելի վաղ Թրամփը սպառնացել էր առանց պաշտպանության թողնել ՆԱՏՕ-ի «դեֆոլտները»։
Փետրվարի 10-ին Հարավային Կարոլինայում անցկացված հանրահավաքում Դոնալդ Թրամփը պատմել է ՆԱՏՕ-ի երկրներից մեկի ղեկավարի հետ իր ենթադրյալ զրույցի մասին։
«Մեծ երկրի նախագահներից մեկը ոտքի կանգնեց և ասաց՝ «Պարո՛ն, եթե մենք չվճարենք և հարձակման ենթարկվենք Ռուսաստանի կողմից, դուք մեզ կպաշտպանե՞ք»»,- պատմել է Թրամփը։
Ի պատասխան՝ նա, իր խոսքով, ընդգծել է, որ այդ երկրին պաշտպանություն չի տրամադրի, հակառակը, կխրախուսի Ռուսաստանին՝ «անել այն, ինչ ուզում է»։
ՆԱՏՕ-ի գլխավոր քարտուղար Յենս Ստոլտենբերգն այդ հայտարարությունից հետո վստահեցրել է, որ Հյուսիսատլանտյան դաշինքը «պատրաստ է և ի վիճակի է պաշտպանել բոլոր դաշնակիցներին»՝ ի դեմս ռազմական սպառնալիքի։
Նախագահական ընտրություններում Թրամփի պոտենցիալ մրցակից՝ ԱՄՆ գործող նախագահ Ջո Բայդենը իր հակառակորդի խոսքերը վտանգավոր է անվանել։ Իսկ եվրոպական դիվանագիտության ղեկավար Ժոզեպ Բորելը կոչ է արել եվրոպական երկրներին՝ մեծացնել սեփական պաշտպանական ներուժը, քանի որ «ամերիկյան հովանոցը միշտ չէ, որ կարող է բաց լինել»։
