ԵՄ-ում սառեցված ռուսական ակտիվներից ստացված միջոցների 90 տոկոսը պետք է օգտագործվի Խաղաղության եվրոպական հիմնադրամի միջոցով Ուկրաինայի համար զենք գնելու նպատակով։ Այս մասին հայտարարել է Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Ժոզեպ Բորելը։ Նա նման առաջարկ է ներկայացնելու ԵՄ անդամ երկրներին մարտի 20-ին՝ մարտի 21-22-ին նախատեսված ԵՄ գագաթնաժողովից առաջ, գրում է DW-ի ռուսական ծառայությունը։
Նրա խոսքով՝ այս միջոցը թույլ կտա ամեն տարի Ուկրաինային հատկացնել շուրջ 3 մլրդ եվրո։ Բորելը պարզաբանել է, որ ռուսական ակտիվներից ստացված եկամտի մնացած 10 տոկոսը կարող է փոխանցվել ԵՄ բյուջե՝ ուկրաինական պաշտպանական արդյունաբերության ներուժը մեծացնելու համար։
Բրյուսելը նախօրեին հայտարարել է, որ Եվրամիությունը ևս 5 միլիարդ եվրո կհատկացնի Ուկրաինային ռազմական օգնության համար՝ ԵՄ արտաքին հարաբերությունների խորհրդի որոշման համաձայն։
