14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Հնդկաստանը հայտարարել է մոլորակի ամենամեծ ընտրությունների օրը
Քաղաքականություն
18.03.2024 | 16:43
Հնդկաստանը հայտարարել է մոլորակի ամենամեծ ընտրությունների օրը, որին կարող է մասնակցել գրեթե 1 միլիարդ մարդ։ Երկրի խորհրդարանի անդամների քվեարկությունը տեղի կունենա ապրիլի 19-ից հունիսի 1-ը՝ ավելի քան 1 միլիոն ընտրատեղամասերում, գրում է BBC-ի ռուսական ծառայությունը։
Արդյունքները կհրապարակվեն հունիսի 4-ին, բայց արդեն պարզ է, որ հինդու ազգայնական «Բհարաթիա Ջանատա» կուսակցությունը (BJP) հաղթանակ կտանի, իսկ 73-ամյա վարչապետ Նարենդրա Մոդին երրորդ ժամկետով կղեկավարի երկիրը։
Մոդիից առաջ միայն մեկ մարդ է կարողացել այդքան երկար մնալ աշխարհի ամենամեծ ժողովրդավարության ղեկին՝ առաջին վարչապետ Ջավահարլալ Ներուն, անկախ Հնդկաստանի հիմնադիր հայր Մահաթմա Գանդիի դաշնակիցը:
Մոդիի կուսակցությանը հակադրվում է ընդդիմադիր ուժերի խայտաբղետ դաշինքը, որը բզկտված է ներքին վեճերով: Մոդին ակնկալում է ոչ միայն պահպանել Հնդկաստանի խորհրդարանի ստորին պալատի 543 մանդատներից 303-ի աննախադեպ մեծամասնությունը, այլև ավելացնել այն մինչև 370 պատգամավորի։
Որոշ նահանգներում ընտրությունները կանցկացվեն մի քանի փուլով։
«Մենք ժողովրդավարություն ենք բերելու երկրի բոլոր անկյուններում։ Մենք խոստանում ենք ընտրություններն անցկացնել այնպես, որ մնանք ժողովրդավարության փարոս ամբողջ աշխարհում»,- շաբաթ տեղի ունեցած մամուլի ասուլիսում ասել է ընտրական հանձնաժողովի ղեկավար Ռաջիև Կումարը։
Դեռ նախքան ընտրությունների ամսաթիվը հրապարակելը՝ Մոդին սկսել է քարոզարշավը: Վերջին ամիսներին նա ակտիվորեն շրջում է երկրով մեկ, բացում սոցիալական և արդյունաբերական օբյեկտներ, շփվում և աղոթում ժողովրդի հետ։
Մոդին իրեն է վերագրում Հնդկաստանի տնտեսական հաջողությունը, որը բնակչության աճի, հմուտ աշխատուժի և ներդրումների միջոցով մարտահրավեր է նետել հարևան Չինաստանին՝ որպես աշխարհի առաջատար արագ զարգացող տնտեսություն և դարձել այլընտրանք կոմունիստական Չինաստանից փախած արևմտյան կապիտալի համար:
Մոդիի քննադատները նրան մեղադրում են ավտորիտարիզմի, ազգայնականության և կրոնական ատելություն սերմանելու մեջ։
