12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Հյուսիսային Կորեան երեք հրթիռ է արձակել Ճապոնական ծովի ուղղությամբ
Քաղաքականություն
18.03.2024 | 16:16
Հյուսիսային Կորեան կրկին հրթիռային փորձարկումներ է իրականացրել և երեք բալիստիկ հրթիռ արձակել Ճապոնիայի ուղղությամբ, հայտնել է Kyodo գործակալությունը՝ վկայակոչելով Ճապոնիայի պաշտպանության նախարարությանը և կղզու երկրի առափնյա պահպանության ծառայությանը:
Գործակալության տվյալներով՝ հրթիռներն ընկել են Ճապոնիայի բացառիկ գոտուց դուրս։
Ճապոնիայի իշխանությունների նախնական տվյալներով՝ հրթիռի արձակումը հետևանքների չի հանգեցրել։ Ճապոնիայի վարչապետ Ֆումիո Կիշիդան Հյուսիսային Կորեայի կողմից հրթիռների արձակումն անընդունելի է անվանել, հայտնում է Reuters-ը։ Ըստ առափնյա պահպանության՝ հրթիռներն արձակվել են մոտավորապես 30 րոպե տարբերությամբ: Յուրաքանչյուրի թռիչքը տևել է մոտ յոթ րոպե, դրանք թռել են 350 կմ 50 մ բարձրության վրա։
Հունվարի 14-ին նույնպես Հյուսիսային Կորեան միջին հեռահարության բալիստիկ հրթիռ է փորձարկել։ Ըստ Ճապոնիայի՝ հրթիռն ընկել է իր բացառիկ տնտեսական գոտուց դուրս՝ Ճապոնական ծովում։ Տոկիոն Փհենյանին մեղադրել է բալիստիկ հրթիռների փորձարկումներն արգելող ՄԱԿ-ի բանաձևերը խախտելու մեջ։
Փետրվարի 2-ին էլ Հյուսիսային Կորեան տարեսկզբից չորրորդ անգամ արձակել է բազմաթիվ թևավոր հրթիռներ։ Դրանք արձակվել են Կորեական թերակղզու և Չինաստանի միջև ընկած ծովի ուղղությամբ։ Փհենյանը վերջերս բազմիցս հայտնել է «ռազմավարական» թևավոր հրթիռների փորձարկման մասին՝ երկրի «միջուկային հզորությունն» ամրապնդելու համար։ Ի թիվս այլնի՝ փորձարկվել են նոր մշակված թևավոր հրթիռներ, որոնք կարող են արձակվել սուզանավերից։
Ներկայում Կորեական թերակղզում լարվածության զգալի աճ է նկատվում։ Հյուսիսային Կորեան վերջին երկու տարիների ընթացքում նկատելիորեն մեծացրել է հրթիռային փորձարկումների մասշտաբները և խստացրել է հռետորաբանությունը ԱՄՆ-ի և Հարավային Կորեայի դեմ, որոնք նա համարում է թշնամական պետություններ:
Միաժամանակ, Վաշինգտոնն ու Սեուլն ընդլայնել են ռազմական համագործակցությունը, ներառյալ՝ զորավարժությունները։
