«Էքսկավատորով» քանդում են մեր մշակույթը, քաոս է, դադարեցրե´ք բուհերի տեռորը. Աննա Մայիլյան. ՏԵՍԱՆՅՈՒԹ

«Բուհերը պետք է միավորվեն ակադեմիական քաղաքի նախագծի շրջանակում խոշորացման գործընթացի դեմ պայքարում:

«Էքսկավատորով» քանդում են մեր մշակույթը, քաոս է, դադարեցրե´ք բուհերի տեռորը»,- Factor TV-ի հետ զրույցում ասում է երգչուհի, ՀՀ վաստակավոր արտիստ, ԵՊԿ պրոֆեսոր Աննա Մայիլյանը` անդրադառնալով Երևանի Կոմիտասի անվան պետական կոնսերվատորիայի` խոշորացվող բուհերի ցանկում հայտնվելուն:

Նրա համար հասկանալի չէ, թե ինչու պետք է Կոնսերվատորիան տեղափոխվի քաղաքի ծայրամաս, զրկվի իր մշակութային միջավայրից և դառնա պարզապես ֆակուլտետ. «Եթե Կոնսերվատորիայի փոխարեն հյուրանոց է կառուցվում, դրանով ի՞նչ հարց է լուծվում, պարզաբանում եմ ուզում, ինչի՞ համար է բուհը տեղափոխվում, բա չիմանա՞նք: Ասում են` դուք չեք որոշում այդ հարցը. վաղն էլ օպերային թատրոնն են տեղափոխելու: Սա չեղավ` ժողովրդավարություն»:
Աննա Մայիլյանը նշում է` իր ականջին շշուկներ են հասել այն մասին, որ կոնսերվատորիայի շենքն արդեն գնորդ ունի. «Եթե որևէ մեկը գնել է շենքը, մենք պետք է իմանանք` ով է գնել և ինչի համար: Միայն այդ մտքից, որ շշուկները կարող են ճիշտ լինել, մենք չենք կարողանում աշխատել»:

Բարձրագույն կրթության և գիտության կոմիտեի նախագահ Սարգիս Հայոցյանը, անդրադառնալով կոնսերվատորիայի շենքի ճակատագրին` նշել էր, որ կառավարության կողմից կա հստակ հանձնարարական` կազմել ազատված գույքի մենեջմենթի մեխանիզմ.«Գիտական կազմակերպություններ կան, որոնք կարող են տեսականորեն վարձակալել տարածքը»-ասել էր նա:
Աննա Մայիլյանը, սակայն, հարցնում է` ինչպե՞ս կարող է Կոմիտասի անվան կոնսերվատորիան դառնալ վարձակալական օբյեկտ.

«Վախենում եմ այդ մտքից, դա ուղղակի անհնար է: Անարժանապատիվ քայլ է կոնսերվատորիան ոչնչացնելը կամ վարձով տալը»:
Երգչուհու խոսքով`կոնսերվատորիայի «լեզուն» երկար է, և աշխարհի երաժիշտները ոտքի են կանգնելու այն տեղափոխելու կամ այլ բուհերի միավորելու դեմ. «Պոկել կոնսերվատորիան և շպրտել քաղաքից` կնշանակի քար գցել մեր մշակույթի գլխին»:

Մանրամասները` տեսանյութում:

Աննա Բաբաջանյան