«Ո՛չ ընդդիմություն, ո՛չ ազատություն, ո՛չ ընտրություն»․ Շառլ Միշելը «շնորհավորել է» Պուտինին «համոզիչ հաղթանակի» կապակցությամբ

Եվրոպական խորհրդի նախագահ Շառլ Միշելը X սոցցանցի իր միկրոբլոգում մեկնաբանել է ՌԴ նախագահական ընտրությունները։

«Ցանկանում եմ շնորհավորել Վլադիմիր Պուտինին այսօր մեկնարկող ընտրություններում համոզիչ հաղթանակի կապակցությամբ։ Ո՛չ ընդդիմություն, ո՛չ ազատություն, ո՛չ ընտրություն»,- գրել է Միշելը։

ԵՄ-ի և ՆԱՏՕ-ի այլ քաղաքական գործիչներ նույնպես թերահավատություն են հայտնել Ռուսաստանի Դաշնությունում նախագահական ընտրությունների վերաբերյալ։

Այսպես, եվրոպական դիվանագիտության ղեկավար Ժոզեպ Բորելի ներկայացուցիչն ասել է, որ ժամանակակից Ռուսաստանում դժվար է պատկերացնել արդար և ժողովրդավարական քվեարկություն։ ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ այս ընտրությունները չեն կարող լինել ազատ և արդար։

«Ռուսաստանում ընտրություններն ազատ և արդար չեն լինելու։ Մենք գիտենք, որ ընդդիմադիր քաղաքական գործիչների մի մասն անազատության մեջ է, մյուսները սպանվել են, շատերը՝ աքսորում»,- ասել է նա:

Հիշեցնենք, որ մարտի 15-ին Ռուսաստանում և Ռուսաստանի Դաշնությանը բռնակցված Ուկրաինայի տարածքներում մեկնարկել են եռօրյա նախագահական ընտրությունները։ Քվեարկության հիմնական օրը մարտի 17-ն է։ Ընտրություններին մասնակցում են չորս թեկնածուներ․ բացի գործող նախագահ Վլադիմիր Պուտինից՝ իրենց թեկնածություններն են առաջադրել Լեոնիդ Սլուցկին՝ Լիբերալ-դեմոկրատական կուսակցությունից, Նիկոլայ Խարիտոնովը՝ ՌԴ Կոմունիստական կուսակցությունից, Վլադիսլավ Դավանկովը՝ «Նոր մարդիկ» կուսակցությունից։

Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չի գրանցել։