Առաջին խախտումները՝ ՌԴ նախագահական ընտրություններում

Քվեարկության առաջին օրը մեկնարկել է և ամեն բան ընթանում է ճիշտ այնպես, ինչպես մենք զգուշացնում էին՝ ստիպողաբար եկած մեծ թվով ընտրողներ, առանց դիտորդների ու էքզիթ-փոլերի հակազդման։ Telegram-ում այս մասին գրել է «Գոլոս» ընտրողների իրավունքների պաշտպանության հասարակական շարժման համանախագահ Ստանիսլավ Անդրեյչուկը, փոխանցում է DW-ի ռուսական ծառայությունը։

«Գոլոսի» տեղեկությունների համաձայն՝ հեռահար քվեարկության էլեկտրոնային պորտալները չեն դիմանում ծանրաբեռնվածությանը, քանի որ ընտրողների պաշտոնական մասնակցությունը «չափազանց բարձր է»․ Կամչատկայում, առավոտյան ժամը 10։00-ի դրությամբ, քվեարկելու ցանկություն ունեցողների թիվն ավելի քան 70 տոկոս է։

«Համակարգի օպերատորները գրում են մեծ «շահագրգռվածության» մասին, սակայն մենք դրա բնույթը լավ հասկանում ենք՝ քվեարկում են առավոտ շուտ՝ աշխատատեղերում՝ ղեկավարների համակ ուշադրության ներքո»,- գրել է Անդրեյչուկը՝ պարզաբանելով, որ «մեծ զեղծարարությունների կանխատեսումը կիրականանա»։

ՌԻԱ Նովոստիի հաղորդմամբ՝ ընտրատեղամասերի բացումից ընդամենը մի քանի րոպե անց, որոնք սկսել են գործել Մոսկվայի ժամանակով 07։00-ին, Ռուսաստանում հեռահար քվեարկության էլեկտրոնային համակարգի աշխատանքի ընդհատումներ են գրանցվել «քվեարկել ցանկացողների աննախադեպ քանակի պատճառով»։

«Ամեն ինչ լավ է ընթանում»,- գործակալությունը մեջբերում է Կենտրոնական ընտրական հանձնաժողովի (ԿԸՀ) ղեկավար Էլլա Պամֆիլովային։

Հաղորդվում է, որ Մոսկվայում ժամը 08։30-ի դրությամբ արդեն քվեարկել է ավելի քան 500 հազար մարդ։

Կենտրոնական ընտրական հանձնաժողովի տվյալներով՝ ամբողջ երկրում ընտրողների մասնակցությունը, Մոսկվայի ժամանակով 10.20-ի դրությամբ, կազմել է մոտ 3 տոկոս: Պանֆիլովան նաև հայտնել է, որ Ռուսաստանի 42 շրջաններում, որոնց թվում Կենտրոնական ընտրական հանձնաժողովը ներառում է նաև Ուկրաինայի բռնակցված տարածքները, վաղաժամկետ քվեարկել է գրեթե 2,6 միլիոն մարդ։ Վաղ քվեարկությունն անցկացվել է փետրվարի 26-ից մարտի 14-ը։ ԿԸՀ նախագահը պնդում է, որ նախագահական ընտրություններին հետևում է «ավելի քան 333 հազար մարդ»։

Ընտրություններին մասնակցում են չորս թեկնածուներ․ բացի գործող նախագահ Վլադիմիր Պուտինից՝ իրենց թեկնածություններն են առաջադրել Լեոնիդ Սլուցկին՝ Լիբերալ-դեմոկրատական կուսակցությունից, Նիկոլայ Խարիտոնովը՝ ՌԴ Կոմունիստական կուսակցությունից, Վլադիսլավ Դավանկովը՝ «Նոր մարդիկ» կուսակցությունից։

Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չի գրանցել։