03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Խորվաթիայի խորհրդարանն ինքնալուծարման որոշում է կայացրել
Քաղաքականություն
15.03.2024 | 13:14
Խորվաթիայում կայանալիք խորհրդարանական ընտրությունների նախօրեին որոշում է կայացվել ցրել խորվաթական Սաբորը՝ երկրի միապալատ խորհրդարանը։ Այս մասին հայտարարել է խորհրդարանի խոսնակ Գորդան Յանդրոկովիչը։
«143 կողմ ձայներով մենք որոշեցինք լուծարել Խորվաթիայի խորհրդարանը»,- ասել է Յանդրոկովիչը՝ ամփոփելով քվեարկության արդյունքները։
Սաբորի նոր կազմը կընտրվի ընտրությունների ժամանակ, որոնք նախատեսված էն անցկացնել ապրիլի վերջին կամ մայիսի սկզբին։ Ընտրությունների օրը պետք է հաստատի Խորվաթիայի նախագահ Զորան Միլանովիչը։
Սպասվում է, որ բոլոր ընթացակարգերը պետք է ավարտվեն մինչև Եվրախորհրդարանի ընտրությունները, որոնք կանցկացվեն ԵՄ-ում հունիսի 6-ից 9-ը։
Խորհրդարանը ցրելու նախաձեռնությամբ հանդես է եկել Խորվաթիայի վարչապետ Անդրեյ Պլենկովիչը։ Քննադատներն ասում են, որ Պլենկովիչը որոշել է արտահերթ ընտրություններ անցկացնել, քանի որ վախենում է, որ իր ղեկավարած Խորվաթիայի դեմոկրատական միություն կուսակցությունը հետագայում կկորցնի ժողովրդականությունը: Ի սկզբանե Խորվաթիայում խորհրդարանական ընտրությունները պետք է կայանային աշնանը։
Իր հերթին, մարտի 14-ին Սաբորն ընդունել է վիճահարույց օրենք, որը նախատեսում է պատիժ նրանց համար, ովքեր դատական հետաքննություններից տեղեկատվություն են փոխանցում լրագրողներին: Ընդդիմությունը կարծում է, որ այս օրենքը նպատակ ունի քողարկել Պլենկովիչի մերձավոր կոռումպացված քաղաքական գործիչներին։
