Ռուսաստանում մեկնարկել են նախագահական ընտրությունները

Ռուսաստանում մենկարկել է նախագահական ընտրությունների քվեարկությունը. մարտի 15-ի առավոտյան հանրապետության ողջ տարածքում բացվել են ընտրատեղամասերը։ Քվեարկությունը կտևի երեք օր, իսկ մարզերի մեկ երրորդում այն կլինի նաև էլեկտրոնային։ «Կասկած չկա, որ դրանց արդյունքներով Վլադիմիր Պուտինը հինգերորդ անգամ կդառնա նախագահ»,-, գրում է BBC-ի ռուսական ծառայությունը։

Երեք թեկնածուների է թույլատրվել այս ընտրություններում «մրցակցել» ներկայիս նախագահ Պուտինի հետ՝ ՌԴ Կոմունիստական կուսակցության պատգամավոր Նիկոլայ Խարիտոնովը, ԼԴՊՌ-ի ղեկավար Լեոնիդ Սլուցկին և Դումայի փոխխոսնակ «Նոր մարդիկ» կուսակցությունից Վլադիսլավ Դավանկովը։ Այս թեկնածություներից որևէ մեկը չի դատապարտում ուկրաինական պատերազմը,  կամ հանդես չի գալիս Պուտինի ուղիղ քննադատությամբ։

Իրապես անկախ թեկնածուներին թույլ չի տվել մասնակցել ընտրություններին. գրանցման գործընթացում Կենտրոնական ընտրական հանձնաժողովը մերժել է ինչպես Ռժևից լրագրող Եկատերինա Դունցովային, այնպես էլ «Քաղաքացիական նախաձեռնություն» կուսակցության կողմից առաջադրված գործիչ Բորիս Նադեժդինին։ Երկուսն էլ քննադատում էին Ուկրաինա ներխուժումը և հանդես էին գալիս պատերազմի ավարտի օգտին:

Վլադիմիր Պուտինի համար սա հինգերորդ ընտրությունն է լինելու։ Նա կարող է կրկին ընտրվել պետության ղեկավարի պաշտոնում այն պատճառով, որ 2020 թվականին Պետդումայի օգնությամբ Պուտինը վերաշարադրեց Ռուսաստանի Սահմանադրությունը՝ «վերափոխելով» սեփական նախագահական ժամկետները։