20.05.2024 | 17:12
Ոստիկանները Կիրանցում բիրտ ուժով բերման են ենթարկել 14 ցուցարարի․ ՏԵՍԱՆՅՈՒԹ
Ազատ Դեմոկրատներ կուսակցությունը ևս ողջունում է Եվրոպական խորհրդարանի կողմից ընդունված բանաձևը
Քաղաքականություն
14.03.2024 | 16:17
Ազատ Դեմոկրատներ կուսակցությունը հայտարարություն է տարածել, որով ողջունում է Եվրոպական խորհրդարանի կողմից ընդունված բանաձևը։
Հայտարարությունը՝ ստորև․
«Եվրոպական խորհրդարանի կողմից երեկ ընդունված «ԵՄ և Հայաստանի միջև ավելի սերտ կապերի և Ադրբեջանի և Հայաստանի միջև խաղաղության համաձայնագրի կնքման անհրաժեշտության վերաբերյալ» բանաձևը (www.europarl.europa.eu/doceo/document/RC-9-2024-0163_EN.html) կարևորագույն ազդակ է Հայաստանի Հանրապետության համար տարածաշրջանային ներկայիս մարտահրավերների պայմաններում և լուրջ հնարավորություն Հայաստանի նկատմամբ իրականացվող քաղաքական, անվտանգային և տնտեսական ճնշումների և շրջափակման պայմաններում:
Ազատ Դեմոկրատներ կուսակցությունը ողջունում է Եվրոպական խորհրդարանի կողմից ընդունված բանաձևը: Վստահ ենք, որ թե՛ անվտանգության և թե՛ տնտեսաական զարգացման առումով առավել արդյունավետ ուղղություն, քան ԵՄ ինտեգրումն է, Հայաստանի համար որևիցե այլ ուղղություն չի կարող ապահովել: Ավելին, ցավով ենք նշում, որ այս ժամանակահատվածը կորսված ժամանակահատված էր մեր պետության համար, քանզի ժամանակին տվյալ ուղղությամբ ճիշտ քայլեր ձեռնարկելու դեպքում և Ասոցացման պայմանագրի ստորագրման պարագայում վստահ ենք, որ հնարավոր կլիներ խուսափել Արցախի Հանրապետության այս ցավալի ճակատագրից :
Միևնույն ժամանակ, վստահ ենք, որ Արցախի մեր հայրենակիցների հիմնարար իրավունքները պաշտպանելու և իրացնելու ավելի գործուն հարթակ, քան ԵՄ և ՄԱԿ կառույցներն են, գոյություն չունեն: Դա են վկայում նաև այս ընթացքում ընդունված մի շարք բանաձևեր և հայտարարություններ, որոնցում հստակ շեշտվում է արցախահայության հիմնարար իրավունքների հարգման, վերջիններիս՝ սեփական հայրենիքում ապրելու իրավունքի անհապաղ իրացման կարևորությունը:
Երեկ Եվորպական խորհրդարանի կողմից ընդունված բանաձևում էլ հստակ շեշտվում է, արցախահայության հիմնարար իրավունքների իրացման պահանջը և կոչ է անում Ադրբեջանին ապահովելու նրանց հիմնարար իրավունքների հարգանքը և երաշխավորելու նրանց անվտանգությունը, ներառյալ միջազգային ներկայության ներքո իրենց տները արժանապատիվ և ապահով կերպով վերադառնալու և այնտեղ ապրելու նրանց իրավունքը:
Բանաձևում հստակ նշվում է նաև, որ ԼՂ նախկին ղեկավարներին պահելով գերության մեջ և նրանցից հարցազրույցներ վերցնելով Ադրբեջանը հստակ խախտում է 1929 թվականի Ժնևի կոնվենցիաները:
Կարևորում ենք նաև, որ Բանաձևում Եվրոպական խորհրդարանը դատապարտում է միջազգայնորեն ճանաչված Հայաստանի տարածք ադրբեջանական ռազմական ներխուժումը և դրա որոշ հատվածների շարունակվող օկուպացիան և վերահաստատում Ադրբեջանի զորքերը Հայաստանի ամբողջ ինքնիշխան տարածքից դուրս բերելու իր պահանջը, նշելով, որ ադրբեջանական բանակը շարունակում է օկուպացված պահել Հայաստանի ինքնիշխան տարածքի մոտ 170 քառակուսի կիլոմետրը:
Ավելին՝ նախազգուշացնում է Ադրբեջանին Հայաստանի նկատմամբ ցանկացած պոտենցիալ ռազմական արկածախնդրության վերաբերյալ, ընդգծում, որ Նախիջևանի էքսկլավի հետ Ադրբեջանի կապի խնդիրները պետք է լուծվեն Հայաստանի ինքնիշխանության և տարածքային ամբողջականության նկատմամբ լիակատար հարգանքով:
Նկատենք, որ ՀՀ ռազմավարական դաշնակից ՌԴ-ի և ՀԱՊԿ-ի կողմից մինչ օրս որևիցե հստակ դիրքորոշում՝ նույնիսկ հայտարարությունների մակարդակով, չի հնչել ՀՀ տարածքային ամբողջականոության խախտումների, մեր գնահատմամբ՝ Արցախում իրականացված ցեղասպանության վերաբերյալ, այն դեպքում, երբ թե՛ ՌԴ և թե՛ ՀԱՊԿ Հայաստանի նկատմամբ հստակ պայմանագրային պարտավորություններ ունեն:
Ազատ Դեմոկրատներ կուսակցության գնահատմամբ, այսօրվա աշխարհաքաղաքական բարդագույն իրավիճակում անթույլատրելի է երերացող արտաքին քաղաքականություն վարելը: Հայաստանի Հանրապետությունը պետք է ընտրի ԵՄ ինտեգրման ճանապարհը, քանզի դա բխում է բացառապես ՀՀ պետական շահից և ՀՀ ազգային և անվտանգային շահերի ապահովման կարևորությունից, և անթույլատրելի է որոշ կենտրոնների կողմից դա դիտարկել որպես հակադրություն որևէ երկրի շահերի:
Այս համատեքստում ավելորդ չենք համարում նշել նաև, որ անթույլատրելի ենք համարում Ադրբեջանի հետ սահմանազատման և սահմանագծման գործընթացի հատվածական իրականացումը, քանզի այն պետք է իրականացվի ամբողջական՝ բոլոր սկզբունքների հստակեցմամբ և ՀՀ միջազգայնորեն ճանաչված տարածքից ադրբեջանական զորքերի դուրսբեումից հետո»:
Հիշեցնենք, որ երեկ Եվրախորհրդարանի լիագումար նիստին ներկայացված ԵՄ-ի և Հայաստանի միջև կապերի սերտեցման, Հայաստանի և Ադրբեջանի միջև խաղաղության համաձայնագրի անհրաժեշտության վերաբերյալ բանաձևն ընդունվեց 504 կողմ, 4 դեմ, 32 ձեռնպահ քվեով։
Նշենք, նաև Պահպանողական կուսակցությունը նույնպես ողջունել է ԵԽ բանաձևը և իշխանություններին կոչ արել բարեփոխումներ իրականացնել։
