07.10.2026 | 12:28
Իսպանացի մրցավարը որակազրկվել է պատանեկան ԵԱ-ում հայ բռնցքամարտիկների մենամարտերում սխալ որոշումների համար
Ալիևի օգնականը խոսել է ՀՀ-ի հետ «հարաբերությունների ջերմացման մասին»
Քաղաքականություն
14.03.2024 | 16:52
ԵԽԽՎ-ն կողմնակալ դիրքորոշում է ցուցաբերում Ադրբեջանի նկատմամբ։ Այս մասին Բաքվի XI գլոբալ ֆորումի շրջանակում պանելային քննարկման ժամանակ հայտարարել է Ադրբեջանի նախագահի օգնական Հիքմեթ Հաջիևը, փոխանցում են ադրբեջանական լրատվամիջոցները։
Նա նշել է, թե ԵԽԽՎ-ն «խթանում և քարոզում է իսլամատյացությունը»։
«Մենք բազմակողմ ճգնաժամ ենք ապրում, հիմնական խնդիրներից է միջազգային կազմակերպությունների կողմից իրենց պարտավորությունները չկատարելը։ Մենք տեսնում ենք, որ միջազգային կառույցներն ու եվրոպական կազմակերպությունները ճգնաժամ են ապրում։ Տեսնում ենք, որ Եվրախորհրդարանը վերածվել է Ադրբեջանի դեմ իսլամատյացության հարթակի»,- հայտարարել է Հաջիևը։
Նա նաև նշել է, թե Բաքուն, իբր, գործադրում է բոլոր ջանքերը՝ Հայաստանի հետ խաղաղության հաստատելու համար։
«Ազատագրելով Ղարաբաղը՝ Ադրբեջանը կայունություն բերեց Հարավային Կովկաս։ Այսօր Ադրբեջանը բոլոր ջանքերը գործադրում է Հայաստանի հետ խաղաղություն հաստատելու համար։ Բոլորն ականատես են ադրբեջանա-հայկական հարաբերությունների ջերմացմանը»,- նշել է Ալիևի օգնականը։
Հավելենք, որ օրերս էլ Իլհամ Ալիևն էր ԵԽԽՎ-ի ու Եվրախորհրդարանին մեղադրել իսլամատյացության մեջ։
«Այսօր Եվրախորհրդարանը և Եվրոպայի խորհրդի Խորհրդարանական վեհաժողովը վերածվել են հարթակների, որոնք քարոզում են իսլամատյացություն և այդ գաղափարախոսության վրա հիմնված քաղաքականություն են վարում»,- ասել էր Ալիևը։
Նշենք, որ ԵԽԽՎ-ն հունվարի 24-ին Ադրբեջանի պատվիրակությանը կառույցից մեկ տարով հեռացնելու և պատվիրակության լիազորությունները չվավերացնելու որոշում է ընդունել, որն Ադրբեջանում դժգոհության պատճառ է դարձել։ Բացի այդ, պաշտոնական Բաքուն անհանգստացած է Եվրախորհրդարանում ՀՀ-ի և Արցախի դեմ Ադրբեջանի ագրեսիան և այլ գործողությունները դատապարտող բանաձևերի ընդունմամբ։
Էմմա Չոբանյան
