15.01.2026 | 11:12
«Ուրարտուի» նախկին ֆուտբոլիստն ընկել է պատուհանից ու մահացել
Կառավարությունն ինտենսիվ այգեգործությամբ զբաղվող 2 ընկերության ազատեց մաքսատուրքից
Տնտեսություն
14.03.2024 | 11:08
Կառավարությունը չզեկուցվող հարցով բավարարեց «ՖանՖրութ» ընկերության կողմից ներկայացված մաքսատուրքից ազատելու վերաբերյալ հայտը: Գործադիրը ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և նյութերի նկատմամբ սակագնային, մասնավորապես, ներմուծման մաքսատուրքից ազատելու արտոնություն է տվել ընկերությանը:
Ըստ հիմնավորման՝ «ՖանՖրութ» ընկերության կողմից ներմուծվող ապրանքներով նախատեսվում է 150 հա տարածքում հիմնել ինտենսիվ պտղատու այգիներ։
Ընկերությունը ցանկանում է ներմուծել 345 մլն դրամի բեռնատար ավտոմեքենաներ և այլ սարքավորումներ, որոնք նախատեսվում են օգտագործել այգու հիմնման աշխատանքների իրականացման և թողարկված արտադրանքի արագ և որակյալ մատակարարման համար, որի համար էլ դիմել է կառավարությունն՝ արտոնություն ստանալու նպատակով:
Գործադիրն իր որոշումը բացատրում է հետևյալ կերպ․ «Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար։ Հարկ է նշել նաև, որ ՀՀ-ում դեռևս չկան նմանատիպ մակերեսով և տեսակներով տանձի ինտենսիվ այգիներ»:
«ՖանՖրութ»-ը հիմնադրվել է 2021 թվականին։ Նիկոլ Փաշինյանի կառավարությունն այս ընկերությանը 4 տարվա գործունեության ընթացքում արդեն 3-րդ անգամ է արտոնություն տալիս: Այս ընկերության ներդրումային ծրագրին մեկ անգամ արտոնություն է տրվել 2022-ին, հետո՝ 2023-ին:
«Ֆանֆրութ» ՍՊԸ-ի տնօրենն Էդգար Սիսակյան է:
Գործադիրը մեկ այլ չզեկուցվող հարցով էլ որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել Կոտայքի մարզում խնձորի և կեռասի ինտենսիվ այգիների մշակությամբ զբողվող «ԷՄ ԷՌ ԻՆՎԵՍՏ» ընկերությանը: Իսկ այս ընկերությունը հիմնադրվել է թավշյա հեղափոխության տարում՝ 2018 թվականին:
Կառավարությունն «ԷՄ ԷՌ ԻՆՎԵՍՏ»-ին մեկ անգամ էլ մաքսատուրքից ազատել էր 2022 թվականին:
Մանյա Պողոսյան
