23.11.2024 | 19:28
Ֆուտբոլի կանանց ազգային հավաքականը սկսում է նախապատրաստվել ընկերական խաղերին
Եվրախորհրդարանը դիտորդներ չի ուղարկի ՌԴ
Քաղաքականություն
14.03.2024 | 12:13
Եվրախորհրդարանը հեռավորություն է պահպանում այն պատգամավորներից, որոնք կարող են որոշել մեկնել Ռուսաստան՝ որպես դիտորդ մասնակցելու մարտի 15-17-ին կայանալիք նախագահական ընտրություններին՝ նշելով, որ նման լիազորություններ չի տվել եվրոպացի ոչ մի պատգամավորի, փոխանցում է DW-ի ռուսական ծառայությունը։
«Եվրախորհրդարանը չի հետևելու այս ընտրական գործընթացին, հետևաբար, չի մեկնաբանի բուն գործընթացը կամ դրա արդյունքները։ Եվրախորհրդարանի ոչ մի անդամ իրավասու չի դիտարկել կամ մեկնաբանել այս ընտրական գործընթացը Ռուսաստանի Դաշնության տարածքում, բռնակցված Ղրիմում և Ռուսաստանի կողմից օկուպացված ուկրաինական այլ տարածքներում»,- ասվում է հրապարակված մամուլի հաղորդագրության մեջ։
Փաստաթղթում ընդգծվում է, որ եթե Եվրախորհրդարանի որևէ անդամ որոշի մեկնաբանել այս ընտրությունները, ապա դա կանի սեփական նախաձեռնությամբ, և «ոչ մի դեպքում չպետք է հղում կատարի Եվրախորհրդարանին իր հայտարարություններում կամ գործողություններում»։
Ավելի վաղ, ռուսական ընդդիմության ներկայացուցիչներն ու մի շարք եվրոպացի քաղաքական գործիչներ Եվրամիությանը կոչ էին արել չճանաչել ՌԴ նախագահական ընտրությունների արդյունքները։ Ռուս ընդդիմադիր քաղաքական գործիչ Ալեքսեյ Նավալնիի այրին՝ Յուլյա Նավալնայան The Washington Post-ի սյունակում գրել է, որ Վլադիմիր Պուտինի լեգիտիմության ժխտումը կարևոր ազդանշան կլինի ինչպես ամբողջ աշխարհի, այնպես էլ Ռուսաստանի քաղաքացիական հասարակության, ինչպես նաև վերնախավի, որը դեռևս հավատարիմ է Կրեմլին, որ «Ռուսաստանը ղեկավարվում է ոչ թե բոլորի կողմից ճանաչված նախագահի, այլ արհամարհված և հրապարակայնորեն դատապարտված հանցագործի կողմից»:
