ՌԴ ՊՆ-ն հայտնել է Բելգորոդի շրջանում ոչնչացված նոր ԱԹՍ-ների մասին

ՌԴ ռազմական գերատեսչության հաղորդագրության համաձայն՝ ժամը 15:00-ի սահմաններում Բելգորոդի շրջանի տարածքում ուկրաինական երկու անօդաչու թռչող սարք է ոչնչացվել։ Ավելի ուշ ՊՆ Telegram-ալիքում հայտնվել է թարմացում՝ 16:30-ին մեկ այլ անօդաչու թռչող սարք է խոցվել, փոխանցում է BBC-ի ռուսական ծառայությունը։

Բելգորոդն այն շրջաններից մեկն է, որն արդեն երկրորդ օրն է՝ ենթարկվում է անօդաչու թռչող սարքերի զանգվածային հարձակումների։ ՌԴ Պաշտպանության նախարարության տվյալներով՝ մինչ այդ անօդաչու թռչող սարք է խոցվել Բելգորոդի շրջանում մոտավորապես ժամը 14:00-ին, 12:30-ին, 11:00-ին և 9:30-ին: Գիշերը, ըստ ռուս զինվորականների, տարածաշրջանում խոցել կամ որսացել են 11 անօդաչու թռչող սարք։

Ուկրաինական կողմը չի մեկնաբանում անօդաչու սարքերի հարձակումների ակտիվացումը, որոնք ազդել են նաև ռուսական նավթավերամշակման գործարանների վրա։ Այսօր Ռոստովի նահանգապետը հայտարարել է Նովոշախտինսկի նավթամթերքների գործարանի աշխատանքի դադարեցման մասին, որը ամենամեծն է Ռուսաստանի հարավում։ Դրա տարածքում ԱԹՍ-ներ են ընկել։

Անօդաչու թռչող սարքերով հարձակումներ են գրանցվել նաև Ռյազանի նավթավերամշակման գործարանի վրա, որտեղ հրդեհ է բռնկվել։

Նախօրեին անօդաչու թռչող սարքերի հարձակումների ալիքի ժամանակ հրդեհ էր բռնկվել Նիժնի Նովգորոդի մերձակայքում գտնվող Lukoil նավթավերամշակման խոշոր գործարանում և Օրյոլում գտնվող նավթի պահեստում։ Լենինգրադի նահանգապետը պնդում է, որ չորեքշաբթի անօդաչու սարքը չի կարողացել հասնել Կիրիշիի նավթավերամշակման գործարան։