15.09.2026 | 18:03
«Քրոջս հաշվին եք ուզում «հողեր հետ բերել», որը զոհվել է 2022-ին՝ ծառայության ընթացքում»․ Ալխաս Ղազարյան․ ՏԵՍԱՆՅՈՒԹ
ԵՄ-ն չեղարկել է Yandex-ի համահիմնադիր Արկադի Վոլոժի և Սերգեյ Մնդոյանցի դեմ պատժամիջոցները
Քաղաքականություն
13.03.2024 | 16:04
Yandex-ի համահիմնադիր Արկադի Վոլոժը հանվել է ԵՄ պատժամիջոցների ցուցակից։ Ցանկում համապատասխան փոփոխությունները հրապարակվել են Եվրոպական խորհրդի ամսագրում: Բացի Վոլոժից՝ չեղարկվել են նաև «Սիստեմա» ընկերության նախկին փոխնախագահ Սերգեյ Մնդոյանցի և Սլովակիայի քաղաքացի Յոզեֆ Համբլեքի նկատմամբ պատժամիջոցները, գրում է DW-ի ռուսական ծառայությունը։
Բացի այդ, ԵՄ-ն պատժամիջոցների ցուցակից հանել է մի շարք մարդկանց՝ նրանց մահվան կապակցությամբ․ նրանց թվում են «Վագներ»-ի հրամանատար Դմիտրի Ուտկինը, որն անցյալ տարի օգոստոսին զոհվել է Եվգենի Պրիգոժինի հետ ինքնաթիռի վթարի ժամանակ, ինչպես նաև Պետդումայի պատգամավորներ Նիկոլայ Բորցովը և Դմիտրի Զուբարևը, ՌԴ պաշտպանության փոխնախարար Գենադի Ժիդկոն։ Ընդ որում, անձամբ Պրիգոժինը չի հանվել ցուցակից։ Փաստաթղթում այս որոշումը բացատրվում է նրանով, որ նրա որդին՝ Պավելը, նույնպես պատժամիջոցների տակ է և հանդիսանում է անմիջական ժառանգորդը։ Դրա համար էլ «նպատակահարմար է պահպանել պատժամիջոցները Եվգենի Պրիգոժինի ակտիվների նկատմամբ»։
«Հավանականություն կա, որ համապատասխան ակտիվներն այլ կերպ կօգտագործվեն Ուկրաինայի դեմ Ռուսաստանի ագրեսիվ պատերազմի կամ այլ գործողությունների ֆինանսավորման համար, որոնք խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը»,- ասվում է փաստաթղթում։
Վոլոժը հայտվել էր եվրոպական պատժամիջոցների ցուցակում 2022 թվականի հունիսին։ Դրանից հետո նա թողել էր ղեկավար պաշտոնները Yandex-ում և խմբի միջազգային դուստր ձեռնարկություններում:
2023-ի օգոստոսին Վոլոժը պատերազմի սկզբից ի վեր առաջին անգամ դեմ էր արտահայտվել Ուկրաինայում ռուսական զորքերի գործողություններին՝ ներխուժումն անվանելով «բարբարոսական»։ Դրանից անմիջապես հետո հայտնի էր դարձել, որ գործարարը խնդրել է ԵՄ-ին չեղարկել իր դեմ պատժամիջոցները։
