12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Էրդողանը հայտարարել է, որ Պուտինի այցին սպասում է ՏԻՄ ընտրություններից հետո
Քաղաքականություն
13.03.2024 | 13:10
Թուրքիայի նախագահ Ռեջեփ Թայիփ Էրդողանը դեսպանների հետ ընթրիքի ժամանակ ունեցած ելույթում անդրադարձել է ռուս-ուկրաինական պատերազմին՝ հայտարարելով, որ ՌԴ-ն պետք է ընդգրկվի բանակցություններում, հաղորդում է TRT Haber-ը։
«Մենք ցույց տվեցինք մեր աջակցությունը Ուկրաինայի ինքնիշխանությանը և տարածքային ամբողջականությանը, մենք նաև հայտարարել ենք, որ խաղաղության ծրագրերը, որոնք բացառում են Ռուսաստանը, արդյունք չեն տա»,- ասել է Էրդողանը։
Նա ընդգծել է, որ նախորդ ուրբաթ օրը Ստամբուլում հյուրընկալել է Ուկրաինայի նախագահ Վլադիմիր Զելենսկիին, իսկ այժմ սպասում է ՌԴ նախագահ Վլադիմիր Պուտինին։
«Ընտրություններից հետո (խոսքը մարտի 31-ի ՏԻՄ ընտրությունների մասին է) մենք հյուրընկալելու ենք ՌԴ նախագահին։ Մենք աշխատում ենք Սև ծովում նավագնացության անվտանգությունը վերականգնելու և հացահատիկի անվտանգ առևտուր ապահովելու ուղղությամբ»,- նշել է Էրդողանը։
Ըստ Թուրքիայի նախագահի՝ չպետք է թույլ տալ, որ հակամարտությունը տարածվի դեպի ՆԱՏՕ-ի տարածք։
«Մենք կարծում ենք, որ պետք է խուսափել ցանկացած քայլից, որը կսրի հակամարտությունները տարածաշրջանում և կհանգեցնի դրանց տարածմանը դեպի ՆԱՏՕ։ Մենք շարունակում ենք մեր ջանքերը՝ ուղղված Ռուսաստանի և Ուկրաինայի միջև խաղաղության հաստատմանը, այն կարգախոսով, որ պատերազմում հաղթողներ չկան, և խաղաղ պայմաններում՝ պարտվողներ»,- ասել է Թուրքիայի նախագահը։
Հավելենք, որ ռուսական և թուրքական դիվանագիտական աղբյուրներն ու միջազգային լրատվամիջոցները հայտնում էին, որ Պուտինի այցը Թուրքիա տեղի է ունենալու փետրվարի 12-ին։ Այն, որ այցը լինելու է փետրվարին, հայտնել էր նաև ՌԴ նախագահի արտաքին հարաբերությունների հարցերով օգնական Յուրի Ուշակովը։ Այդ այցը, սակայն, այդպես էլ չկայացավ։
Էմմա Չոբանյան
