Քոչարյան-ՀՅԴ համգործակցությունը կործանում կլինի Հայաստանի համար․ Արամ Սարգսյան

Հայաստանում ծավալված ներքաղաքական զարգացումների,  Ռոբերտ Քոչարյանի՝ քաղաքականություն վերադարձի և ՀՅԴ-ի հետ հնարավոր համագործակցության մասին Factor.am-ը զրուցեց Դեմոկրատական կուսակցության նախագահ Արամ Սարգսյանի հետ։

-Պարո’ն Սարգսյան, վերջին շրջանում քաղաքական օրակարգի ամենաքննարկվող հարցերից մեկը  2-րդ նախագահ Ռոբերտ Քոչարյանի՝ քաղաքականություն վերադառնալու մասին հարցն է, իսկ այդ պարագայում Ռ․ Քոչարյանի հետ համագործակցությունը չի բացառել Հայ հեղափոխական դաշնակցությունը։

-Ո՞վ  է նման օրակարգ նետել դաշտ, նման օրակարգի դեպքում մենք անընդհատ մի տեղից մյուս տեղն ենք գնալու և անընդհատ պետք է որոշենք, թե Հայաստանը ո՞ր ճանապարհով պետք է գնա դեպի զարգացում։ Մեր կարծիքով՝ այսօրվա իրավիճակում պետք է քաղաքական ուժերը քաղաքական խորհուրդ ստեղծեն իշխանությունների աջակցությամբ և վերլուծեն, թե այս 27 տարվա ընթացքում որո՞նք են եղել մեր սխալները, հանցանքներն ու հանցագործությունները։ Ամբողջական գույքագրում է պետք նաև անցկացնել՝ պարզելու համար ինչպե՞ս է թալանվել մեր ունեցվածքը։ Այս հարցն է պետք դնել օրակարգում, որը ճիշտ օրակարգ կլինի, ինչից հրաժարվելու պարագայում մենք անընդհատ մեկ տեղից մյուս տեղ ենք տեղափոխվելու։ 

Իսկ Քոչարյան-ՀՅԴ համագործակցության մասին պետք է նշեմ, որ Քոչարյանը դեռ մեղադրյալի կարգավիճակում է և դեռ չի ազատվել պատասխանատվությունից։ 

-ՀՅԴ-ն կարո՞ղ է դառնալ այս փուլում Ռոբերտ Քոչարյանի քաղաքական հենարանը։

-Նախքան Քոչարյանի համար քաղաքական հենարան դառնալը, նախ պետք է Դաշնակցությունը ճշտի՝ թե ինչպիսի՞  հասարակական հենարան ունի հենց ինքը։ Այս ուժը ժողովրդի աջակցությունը չունի, իսկ ինչ վերաբերում է այդ կուսակցության և Քոչարյանի հետ համագործակցությանն ու նախկին ժամանակները վերականգնելու ցանկությանը,  ապա դա բացառված է․ Քոչարյան-ՀՅԴ համագործակցությունը կործանում կլինի Հայաստանի համար՝ հատկապես, որ մենք տեսել ենք նրանց կառավարման տարիները։ 

-Դուք բացառո՞ւմ եք Ռոբերտ Քոչարյանի՝ քաղաքականություն վերադառնալու հանգամանքը։

-Չեմ բացառում, պարզապես,  նման համագործակցությունը չի ունենա իրենց ակնկալած արդյունքը։ Մյուս կողմից, եթե այսօրվա իշխանությունները ճիշտ քաղաքականություն վարեն,  դա չի լինի․ խոսքն այստեղ նոր Կառավարության ռեալ, ոչ թե էյֆորիկ տրամադրությունների վրա հիմնված քաղաքականության մասին է։ Ճիշտ է, այժմ սխալներ կան, սակայն, ես կարծում եմ, որ կփոխվեն,  դրանք կուղղվեն, երիտասարդ են, պետք է նաև լսեն ավելի մեծ փորձ ունեցող մարդկանց։ Այստեղ ուզում եմ նշել նաև, որ մեր կուսակցությունը բացառում է Ռոբերտ Քոչարյանի հետ որևէ համագործակցություն։

-Ի դեպ, վաղը Նիկոլ Փաշինյանը Հանրապետության հրապարակում կամփոփի իր կառավարման 100 օրը։ Նրա այս որոշումը քննադատվեց, հնչեցին տեսակետներ, որ 100 օրը պետք է ամփոփել փակ սենյակում, որտեղ կհնչեն կոնկրետ հարցեր ու պատասխաններ։ 

-Ես այդ տեսակետը չեմ կիսում։ Սա հաշվետվության մի նոր ձև է հանրության առջև, եթե այս տարբերակն է ընտրել Նիկոլ Փաշինյանը, նշանակում է, որ նաև լուրջ պատրաստվել է, վաղը կլսենք, հետո կարծիքներ կհայտնենք։ 

Աղավնի Սուքիասյան