09.05.2024 | 10:09
Փաշինյանը Հաղթանակի և խաղաղության տոնի առթիվ այցելել է «Հաղթանակ» զբոսայգի․ ՏԵՍԱՆՅՈՒԹ
ԵՄ-ն հուլիսին կարող է ռուսական ակտիվներից շահույթը փոխանցել Ուկրաինային
Քաղաքականություն
12.03.2024 | 22:59
Ուկրաինային ԱՄՆ-ի ֆինանսական աջակցության թուլացման ֆոնին Եվրամիությունը նախատեսում է հուլիսին Կիևին փոխանցել 2-3 միլիարդ եվրո՝ սառեցված ռուսական ակտիվներից ստացված շահույթից։ Այս մասին գրում է բրիտանական Financial Times (FT) պարբերականը՝ վկայակոչելով իր աղբյուրներին։
Ըստ հրապարակման՝ Եվրահանձնաժողովը (ԵՀ) պատրաստել է այս տարվա փետրվարից հետո ստացված ռուսական ակտիվներից շահույթի բռնագրավման ծրագիր։ Ակնկալվում է, որ մինչև 2027 թվականը կբռնագանձվի 20 միլիարդ եվրո շահույթ։
Առաջին տրանշը Կիև կուղարկվի հուլիսին, եթե ԵՄ բոլոր երկրներն աջակցեն այս առաջարկին։ Սպասվում է, որ պաշտոնական հայտարարություն կարվի այս շաբաթ ԵՄ առաջնորդների գագաթնաժողովում:
ԵՀ առաջարկի նախագծի համաձայն, որին ծանոթացել է FT-ն, Բրյուսելն ակնկալում է օգտագործել բելգիական Euroclear-ում ռուսական սառեցված ակտիվներից ստացված զուտ շահույթի 97%-ը և դրանք փոխանցել ԵՄ բյուջե: Այնուհետև գումարը կվճարվի եռամսյակը մեկ կամ տարին երկու անգամ և «կարող է օգտագործվել ի շահ Ուկրաինայի՝ տարբեր համաձայնագրերի համաձայն»:
ԵՄ պլանները հետադարձ ուժով չեն կիրառվի, և Euroclear-ը կպահպանի արդեն կուտակված մոտ 3,85 միլիարդ եվրոյի շահույթը՝ հիմնականում Ռուսաստանի հետ իր վարույթների իրավական ծախսերը հոգալու համար։ Euroclear-ը սառեցրել է ռուսական մոտ 190 միլիարդ եվրոյի ակտիվներ՝ 2022 թվականի փետրվարին Ռուսաստանի զինված ներխուժման սկսվելուց ի վեր:
