Քաղաքականություն
12.03.2024 | 17:14
ԱՄՆ հետախուզության համայնքի 2024 թվականի սպառնալիքների տարեկան գնահատման զեկույցում անդրադարձ է կատարվում նաև Հայաստանին ու Ադրբեջանին։
Մասնավորապես, նշվում է, որ Հայաստանի և Ադրբեջանի միջև հարաբերությունները, ամենայն հավանականությամբ, կշարունակեն լարված մնալ, սակայն Ադրբեջանի կողմից Լեռնային Ղարաբաղի վերագրավումը նվազեցրել է անկայունությունը, և ռազմական առճակատումը, հավանաբար, տևողությամբ և ինտենսիվությամբ աչքի չի ընկնի:
«Այնուամենայնիվ, երկկողմ խաղաղության պայմանագրի բացակայությունը, երկրների զինված ուժերի իրար մոտ լինելը, զինադադարի կիրառման մեխանիզմի բացակայությունը և Ադրբեջանի դիրքորոշումը՝ կիրառելու ռազմական ճնշում Հայաստանի հետ բանակցություններում իր նպատակներին հասնելու համար, պահպանվում են։ Ավելին՝ հանգամանքները, որ Լեռնային Ղարաբաղի կառավարումը էթնիկ հայերից անցել է ադրբեջանցիներին և Ադրբեջանն ունի պահանջը՝ մուտք դեպի իր էքսկլավ ցամաքային միջանցքով, կբարձրացնեն զինված առճակատման վտանգը»,- ասվում է զեկույցում։
Նշվում է, որ 2023 թվականի սեպտեմբերին Ադրբեջանը ռազմական գործողություն է նախաձեռնել, որը հանգեցրել է Լեռնային Ղարաբաղի ինքնապաշտպանության ուժերի պարտությանը և դե ֆակտո ԼՂ-ի իշխանությունների հանձնմանը:
Ըստ ԱՄՆ հետախուզության՝ «տարածաշրջանի էթնիկ հայ բնակչության մեծ մասի արագ հեռանալն ու կառավարության ծրագրված ինքնալուծարումը թույլ տվեցին Բաքվին առաջ տանել տարածաշրջանն Ադրբեջանին ինտեգրելու ծրագրերը՝ փաստացիորեն հեռացնելով այս երկարամյա խնդիրը երկկողմ խաղաղության օրակարգից»։
