Օդեսան ռուսական ԱԹՍ-ների զանգվածային հարձակման է ենթարկվել

Մարտի 10-ի լույս 11-ի գիշերը Ռուսաստանը կրկին անօդաչու թռչող սարքերով զանգվածային հարվածներ է հասցրել Օդեսայի շրջանին։ Ուկրաինայի հարավի պաշտպանության ուժերի տվյալներով՝ ընդհանուր առմամբ, զանգվածային հարձակումների մի քանի ալիք է ձեռնարկվել, Ուկրաինայի հակաօդային պաշտպանությանը հաջողվել է խոցել 10 «Շահեդ-131/136» անօդաչու թռչող սարք, սակայն եղել են նաև հարվածներ, գրում է DW-ի ռուսական ծառայությունը։

Օդեսայի մարզում վնասվել են ենթակառուցվածքային օբյեկտ, վարչական շենքեր, առաջացած հրդեհը մարվել է։ Հարվածի ալիքի հետևանքով տների ապակիներ են կոտրվել, բեկորները վնասել են կենցաղային շինությունները, սակայն, ըստ նախնական տվյալների, զոհեր և վիրավորներ չկան։

«Մարտական աշխատանքը տևել է մեկուկես ժամ, հակաօդային պաշտպանության ստորաբաժանումները հետ են մղել «Շահեդ»-ների զանգվածային գրոհները, որոնք մուտք են գործել Սև ծովից, իսկ բնակելի և արդյունաբերական տարածքների միջև բարդ մանևրները բարդացրել են հակաօդային պաշտպանության աշխատանքը»,- նշվում է հաղորդագրության մեջ։

Ռուսաստանի Պաշտպանության նախարարությունը հայտնել է, որ մարտի 11-ի գիշերը ռուսական հակաօդային պաշտպանությունը խափանել է ՌԴ-ում գտնվող թիրախներին ԱԹՍ-ներով հարվածելու՝ Ուկրաինայի մի քանի փորձ։ ՀՕՊ ուժերը որսացել և ոչնչացրել են չորս ուկրաինական անօդաչու թռչող սարքեր Բրյանսկի, ևս երկուսը՝ Օրյոլի շրջաններում։

Բրյանսկի շրջանի իշխանությունները հայտնել են երկու բնակելի շենքերի մասնակի վնասման մասին, սակայն տուժածներ չկան։ Օրյոլի շրջանում ավերածությունների կամ զոհերի մասին տեղեկություններ չկան։

Կուրսկի շրջանի նահանգապետ Ռոման Ստարովոյտը հայտնել է, որ մարտի 11-ի առավոտյան Սուդժանսկի շրջանի Գոնչարովկա գյուղը գնդակոծվել է Ուկրաինայի կողմից։

«Բնակիչներից մեկը ծանր վիրավորվել է, մյուսն ուղեղի ցնցում է ստացել։ Տները, որտեղ նրանք բնակվել են, մեծ վնասներ են կրել, բեկորներից վնասվել է անձնական մեքենա»,- գրել է Ստարովոյտը։

Ավելի ուշ հայտնի է դարձել, որ տուժածներից մեկը հիվանդանոցում մահացել է։