14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Թուրքիայում ԱՄՆ դեսպանը C-400-ները խնդիր է անվանել Անկարայի և Վաշինգտոնի հարաբերություններում
Քաղաքականություն
11.03.2024 | 21:11
Անկարայում ԱՄՆ դեսպան Ջեֆ Ֆլեյքը թուրքական NTV-ի հետ զրույցում խոսել է թուրք-ամերիկյան հարաբերությունների վերջին զարգացումներից՝ հայտարարելով, որ աջակցում է Թուրքիային F-16-ների վաճառքին։ Դիվանագետը հայտնել է, որ F-35 կործանիչների հարցը նույնպես օրակարգային է եղել Թուրքիայի ԱԳ նախարար Հաքան Ֆիդանի՝ Վաշինգտոն կատարած այցի ժամանակ։
«Ինչպես նախկինում ասվել է՝ C-400-ները դեռևս խնդիր են: Մենք ցանկանում ենք լուծում գտնել: ԱՄՆ պետքարտուղարի տեղակալ Վիկտորյա Նուլանդն առաջարկել է լուծում: Մենք ցանկանում ենք հաղթահարել խնդիրը, բայց դեռ հաջողության չենք հասել»,- ասել է Ֆլեյքը։
Նա նշել է, որ չնայած սիրիական հարցում երկու երկրների տարաձայնություններին, ամեն դեպքում, «Թուրքիան կարևոր դաշնակից է ԻԼԻՊ-ի դեմ պատերազմում»։
Ավելի վաղ Վիկտորյա Նուլանդը հայտարարել էր, որ F-35 կործանիչների ծրագիր Թուրքիայի վերադարձը կապված է C-400 ՀՕՊ համակարգերի հետ, որոնք Անկարան գնել է Մոսկվայից։
«CAATSA-ի պատժամիջոցները կապված են Ռուսաստանի Դաշնությունից C-400 ՀՕՊ համակարգեր գնելու՝ Թուրքիայի կառավարության որոշման հետ։ Ահա թե ինչն է հանգեցրել CAATSA-ի պատժամիջոցներին: Մենք Patriot-ի վաճառքի շուրջ բանակցություններ էինք վարում, և մինչ այդ բանակցությունները շարունակվում էին, Թուրքիան գնաց այլ ուղղությամբ։ Այդ պատճառով մենք այսօր որոշ զրույցներ ունեցանք: Անկեղծ ասած, եթե մենք կարողանանք լուծել C-400-ի խնդիրը, ԱՄՆ-ը հաճույքով կընդունի Թուրքիային F-35-ի ընտանիք»,- ասել էր ԱՄՆ պետքարտուղարի տեղակալը։
Նա նշել էր, որ եթե խնդիրը լուծվի, CAATSA-ի հարցը կվերանա, և կողմերը կկարողանան վերադառնալ F-35-ի շուրջ բանակցություններին։
Նշենք, որ Թուրքիայի ԱԳ նախարար Հաքան Ֆիդանն ԱՄՆ-ում բանակցություններ է անցկացրել տարբեր պաշտոնյաների, այդ թվում՝ պետքարտուղար Էնթոնի Բլինքենի հետ, տեղի է ունեցել «ԱՄՆ-Թուրքիա ռազմավարական մեխանիզմի» հերթական նիստը։
